पहिले प्रौढशिक्षा, अहिले विद्यालय

पोखरा : बहुदल वा पञ्‍चायत भन्‍ने विवाद चरम अवस्थामा थियो । हाल गण्डकी प्रदेशका आर्थिक मामिला तथा योजना मन्त्री किरण गुरुङ आइ.एससीको पढाइ छाडेर सक्रिय राजनीतिमा लागेका थिए ।

नेपाल कम्युनिस्ट पार्टी (नेकपा) मालेमा आबद्ध उनी भूमिगत हुन अहिलेको पोखरा-१६ अर्मलाकोट आसपासको ठाउँ पुगेका थिए । त्यो बेला जनतामा पढाइ-लेखाइको खासै चिन्ता थिएन । 

जनमत संग्रहमा पञ्चायतविरुद्ध चेतना फैलाउन प्रधानपञ्चहरुकै आसपास जानुपर्थ्यो । सो बेला गुरुङसँग एउटा उपाय थियो, प्रौढशिक्षा । `प्रौढशिक्षा पढाउँछु´ भन्दै गाउँ पसेका गुरुङ बुढाबुढीलाई मात्र अक्षर सिकाएनन्, बालक र युवायुवतीलाई पनि सिकाए । 

४ दशक अगाडि जहाँ गुरुङले प्रौढशिक्षा दिएका थिए, त्यही ठाउँमा उनी बिहिबार पुगे । शिक्षा दिन होइन, शिक्षालयको समुद्घाटन गर्न । मन्त्री किरण गुरुङले बिहिवार पोखरा-१६ अर्मलाकोटको श्री सीता आधारभूत विद्यालयको २ कोठे भवनको उद्घाटन गरेका हुन् । 

राष्ट्रिय पुनर्निर्माण प्राधिकरण, जिल्ला कार्यान्वयन इकाइ, शिक्षाको आर्थिक सहयोगमा भवन निर्माण गरिएको थियो । गत असार १८ गते कार्यसम्झौता भएपछि २२ लाख ९८ हजार रुपैयाँ लागतमा २ कोठे भवनसँगै शौचालय निर्माण गरिएको छ । 

उद्घाटन कार्यक्रममा बोल्दै मन्त्री गुरुङले आफू ४ दशकपछि अर्मला फर्किएको र शिक्षाकै कार्यक्रममा सरिक हुन पाउँदा गर्वान्वित भएको बताए । आफ्नो भुमिगत जीवन सम्झँदै उनले शिक्षा आफ्नो राजनीतिक जीवनको आधारशिला बनेको बताए । `म प्रौढ शिक्षा पढाउने भन्दै यहाँ बसें, तपाईंहरूले स्विकारिदिनु भयो, अनि मैले राजनीतिक काम पनि गर्न पाएँ,´ उनले भने ।  

विद्यालय व्यवस्थापन समितीका अध्यक्ष भुपाल गरुङले विद्यालयले अर्मलाकोटको भविष्य फेर्ने आशा प्रकट गरे । विद्यालयले सिर्जनात्मक र रचनात्मक शिक्षा दिने र विद्यार्थीहरुमा पढाइको भोक बढाउन सक्नुपर्ने उनको तर्क थियो । `अहिले अर्मला सानो छ, विद्यालय ठूलो बनाउन परेछैन भन्नुहुँदैन, पछि जनसंख्या बढ्दै जान्छ, भविष्यलाई सोचेर विद्यालयको संरचना बढाउँछौँ,´ उनले भने । 

जिल्ला कार्यान्वयन इकाइ कास्कीका प्रमुख लालप्रसाद पोखरेलले कास्कीमा विद्यालय पुनर्निर्माणको काम तिव्र रुपले बढिरहेको दाबी गरे । कास्कीका सबै स्थानीय तहमा विद्यालयसँगै अन्य भौतिक संरचना निर्माण गरिएको पोखरेलले बताए । 

पोखरेलका अनुसार जिल्लामा अहिले १ सय १२ वटा ४ कोठे विद्यालय भवन निर्माण भैरहेको छ । यस्तै १९ वटा ३ कोठे भवन, ६० वटा २ कोठे भवनसँगै ६६० कक्षाकोठा निर्माणको काम भैरहेको पोखरेलले जानकारी दिए । ११४ वटा शौचालय र ६५ खानेपानीको योजनामा जिल्ला इकाइले काम गरिरहेको पोखरेलले बताए ।