‍संसदीय समितिहरूको चहलपहल सुरू

काठमाडौं : प्रतिनिधि सभा पुनर्स्थापनापछि संसदीय समितिहरूको चहलपहल सुरू भएको छ । सरकारलाई खबरदारी गर्ने र आवश्यक निर्देशन दिने 'मिनी संसद्‍' भनिने संसदीय समितिहरूले आफ्नो नियमित बैठकको कार्यक्रम राखेका छन् ।

प्रधानमन्त्री केपी ओलीले विघटन गरेपछि प्रतिनिधी सभासँगै संसदीय समितिहरू स्वत: विघटित भएका थिए । तर सर्वोच्‍च अदालतले प्रतिनिधी सभा ब्यूँत्याउने फैसला गरेपछि संसदीय समितिहरू फेरी आफ्‍नो नियमित खबरदारीसम्बन्धी क्रियाकलापमा सक्रिय हुने अपेक्षा गरिएको छ ।

शुक्रबार तीन संसदीय समितिहरूले आन्तरिक छलफलका लागि बैठक बस्दैछन् । बिहान ११ बजे कृषि, सहकारी तथा प्राकृतिक स्रोत समितिको बैठक बसेको थियो । त्यस्तै अन्तर्राष्ट्रिय सम्बन्ध समितिले पनि बिहान ११ बजे नै प्रदेशका पर्यटकीय गन्तव्यहरूको सम्बन्‍धमा बैठक राखेको थियो ।

उद्योग तथा वाणिज्य र श्रम तथा उपभोक्ता हित समितिको बिहान साढे ११ बजे बैठक डाकिएको थियो । समितिको वार्षिक प्रतिवेदन र बजार अनुगमन उपसमितिको प्रतिवेदन समितिबाट पारित गर्ने कार्यक्रम छ । कृषिमा वैदेशिक लगानीलाई अनुमति दिने सरकारको निर्णय सम्बन्धमा छलफल गर्ने उल्‍लेख छ ।

सार्वजनिक वृत्तमा हुने भ्रष्टाचार र अनियमितताबारे खबरदारी गर्ने सार्वजनिक लेखा समितिले भने तत्काल बैठक राखेको छैन । उसले बेरुजू सम्बन्धी प्रतिवेदनको बाँकी काम सम्पन्‍न गर्नुपर्ने भएकाले त्यसमा व्यस्त रहेको समितिका सभापति भरतकुमार शाहले बताए ।