‘कर्णालीको आँखामा आँसुमात्रै छैन, सपना पनि छ’

सुर्खेतः कर्णाली उत्सवको दोस्रो संस्करणको पहिलो सत्रमा ‘आम्‍नै कथा,आम्‍नै बान्की’ शीर्षकमा छलफल भएको छ । छलफलमा साहित्यकार बुद्धिसागर, रंगकर्मी हीरा बिजुली नेपाली, देउडा गायक नेत्रराज शाही र लेखक सरला गौतमले आफ्ना विचार राखेका छन् ।

रंगकर्मी हिरा बिजुली नेपालीले कर्णालीलाई डाँडाकाँडा बिकट भन्नेहरूसँग आपत्ति रहेको बताए । ‘डाँडा विकटताको प्रतिक होइन,’ उनले भने, ‘डाँडाकाँडा समस्या होइन संभावना हो ।’
 
रंगमञ्च समाज रुपान्तरणको औजार भएको बताउँदै उनले रंगमञ्चबाटै काठमाडौँमा कर्णाली देखाउने कोसिस गरेको समेत बताए । ‘तर, नाटकमा महिलाको भूमिका पुरुषले निभाउनुपर्ने अवस्था आएको थियो,’ उनले भने, ‘कर्णालीको रंगमञ्चमा रंग फिजाउन अझै धेरै गाह्रो छ । कर्णालीका धेरै आउनुपर्ने कुराहरू बाहिर आएका छैनन् ।’

लेखक सरला गौतमले कर्णालीमा आँसुमात्रै होइन सपना पनि भएको बताइन् । ‘कर्णालीको आँखाले रुदैन मात्रै सपना पनि देख्छ,’ उनले भनिन्, ‘तर, राष्ट्रिय पत्रिकामा पीडाले थलो पाउँछ । विचारले ठाउ पाउँदैन ।’ उनले कर्णाली डुल्दा सपना बोकेर ति सपना साकार पार्नेहरूको कथा सुनाउँदै कर्णालीमा आँसु मात्रै नभएर सपना,उद्यम, उर्जा सबै भएको बताइन् । 

साहित्यकार बुद्धिसागरले कर्णालीको लबजमै मिठास भएको बताए । ‘कर्णालीमा यस्ता साहित्यिक कार्यक्रम हुनु, छलफल हुनु राम्रो हो,’ उनले भने, ‘कर्णालीका कथाहरू पनि आउन थालेका छन् । तर, गहिराइमा आएका छैनन् ।’ 

देउडा गायक नेत्रराज शाहीले कर्णाली भन्ने बित्तिकै देउडा गायन जोडिएर आउने बताए । ‘देउडा कर्णालीको वास्तविक पहिचान हो,’ उनले भने, ‘देउडा गीतबाटै अहिलेका पप, लोक, आधुनिक गीतहरू प्रस्फुटन भएका हुन् ।’