प्रशिक्षक जाबीले जिते पहिलो लिग उपाधि

काठमाडौँ: बार्सिलोनामा समर्थकका लागि आइतबार दुई वटा खबर विशेष रह्यो । पहिलो, क्लबको अध्यक्षका लागि भएको निर्वाचनको मतपरिणाम । दोस्रो, बार्सिलोनाकै पूर्व खेलाडी जाबी हर्नान्डेजले प्रशिक्षक भएपछि जितेको पहिलो लिग उपाधि । 

जाबीको प्रशिक्षणमा रहेको कतारी क्लब अल साडले चार खेल अगाबै त्यहाँको लिग जित्यो । जाबीले खेलाडीका रुपमा पनि कतारी लिग जितिसकेका छन् । सन् २०१५ मा कतारी लिग खेल्न दोहा पुगेका जाबीले अल साडलाई २०१९ को लिग जित्न सहयोग गरेका थिए । जुन उनको लागि खेलाडीका रुपमा जितेको अन्तिम लिग थियो । 

४१ वर्षिय जाबीले प्रशिक्षक भएपछि अल साडलाई कतारी कप र कतारी सुपर कप पनि जिताएका थिए । तर उनको प्रशिक्षणमा लिग च्याम्पियन भएको भने पहिलो पटक हो ।  सार्वजनिकरुपमै बार्सिलोनाको प्रशिक्षक बन्नु सपना भएको बताउने जाबी तत्कालका लागि कतारी क्लबमै रहने अनुमान गरिएको छ ।

पटक पटक स्पेनी सञ्चार माध्यमले जाबीलाई बार्सिलोनाले फिर्ता ल्याउने दाबी गर्दै आएका छन् । तर हालै अध्यक्षमा निर्वाचित भएका जोआओ लार्पोटाले जाबी बार्सिलोनाको प्रशिक्षक बन्ने समय नभइसकेको संकेत गरेको स्पेनी अखबार एएसले लेखेको छ ।