एफएनसीसीआईका पूर्वमहानिर्देशक ओझाको निधन

काठमाडौं  : नेपाल उद्योग वाणिज्य महासंघका पूर्व महानिर्देशक बद्रीप्रसाद ओझाको निधन भएको छ । मृगौलाका बिरामी ७४ वर्षे ओझालाई सोमबार राती ग्राण्डी अस्पताल लैजादैं गर्दा निधन भएको हो ।

ओझा सरकारी जागिर छाडेर नेपाल उद्योग वाणिज्य महासंघको महानिर्देशक बनेका थिए । सरकारी जागिरमा वाणिज्य क्षेत्रमा काम गरेका उनी नेपाल-भारत द्विपक्षीय व्यापार मामिलाका जानकार थिए । २०२९ सालमा तथ्यांक विज्ञका रुपमा जुट विकास समितिमा काम सुरु गरेका ओझाले वाणिज्य मन्त्रालयमा पनि लामो समय काम गरेका थिए ।

सरकारी जागिर छाडेर उनी २०४८ साल साउनदेखि नेपाल उद्योग वाणिज्य महासंघमा प्रवेश गरे र २०६३ साउनको सुरुवाततिर महासंघबाट बाहिरिएका हुन् । महासंघमा रहेर उनले आर्थिक उदारीकरणको नीति अबलम्बन गरिएताका निजी क्षेत्रमैत्री कानुनहरुका लागि पृष्ठपोषण दिने काम गरे । महासंघलाई प्रशासनिक रुपमा सुदृढ गर्न महत्वपूर्ण योगदान गरेका ओझाले अमेरिकी सहयोग नियोग (युएसएड) को सहयोगमा कृषि उद्यम केन्द्र स्थापनामा पनि भूमिका निर्वाह गरेका थिए । महासंघका तत्कालीन अध्यक्ष महेशलाल प्रधान र उपाध्यक्ष विनोद चौधरीले उनलाई महासंघमा ल्याएका थिए ।

ओझाले महासंघको संस्थागत विकासका लागि व्यवस्थापकीय नेतृत्वबाट महत्वपूर्ण काम गरेको स्मरण सुनाउँदै चौधरीले भने, ‘महेशलालजी र मैंले उहाँलाई महासंघमा आमन्त्रण गर्‍यौं । महासंघले दिएको जिम्मेवारीलाई उनले कुशलतापूवर्क निर्वाह गरेका थिए ।’ महासंघको गरिमा र उचाइ बढाउन क्रियाशील ओझाले महासंघमा डेढ दशक बिताएका थिए ।

नेपाल-भारत व्यापारका विज्ञ तथा नेपाल उद्योग वाणिज्य महासंघका पूर्वमहानिर्देशक बद्रीप्रसाद ओझाको निधनले मर्माहत भएको छु । दिवंगत ओझाप्रति भावपूर्ण श्रद्धाञ्जली अर्पण गर्दै शोकसन्तप्त परिवारजनप्रति हार्दिक समवेदना प्रकट गर्दछु । pic.twitter.com/Brcy5pGNP1

— Binod Chaudhary (@BinodKChaudhary) November 4, 2020

स्वर्गीय ओझाका श्रीमति, दुई छोरा र एक छोरी छन् ।