‘म प्रति उहाँ(विप्लव) को विश्वास त्यसै बेला जागेको थियो’

काठमाडौँ  : प्रधानमन्त्री  केपी शर्मा ओलीले नेकपाका महासचिव नेत्रविक्रम चन्द विप्लवले आफूलाई १० वर्ष पहिले नै विश्वास गरेको दाबी गरेका छन् ।  
विप्लव समूह र सरकारबीच भएको सहमति पत्रमा हस्ताक्षर गरेपछि ओलीले भने, ‘रातारात भनेको पढ्या थिएँ । वर्षौंदेखि वार्ता चलेको थियो । नगरा बजाएर वार्ता गरेनौँ। वार्ता नै गर्‍यौँ । यस विश्वासको थालनी ८÷१० वर्ष भयो होला । हामीले घण्टौँ नै छलफल गरेका थियौँ । म प्रति उहाँको विश्वास त्यसै समयदेखि जागेको थियो सायद । तीवटा बुँदा काफी हो ।’ 

उनले १८ पुराणमा व्यासले दुईटा कुरा भने भन्दै भने, ‘परोपकार पुण्याय  । छलफल र वार्ताबाटै टुंग्याउछौँ । शान्तिपूर्ण बाटोबाट टुंग्याउनेछौं भन्नुभएको छ ।’ 
उनले विप्लवका कार्यकर्तालाई छिटै छोडिने पनि बताए । छुट्ने सिलसिला भइसकेको उनको भनाइ छ ।  आज भएको हस्ताक्षर पछि देश नयाँ युगमा प्रवेश गरेको पनि ओलीको भनाइ छ ।  

‘पृथकतावादी आन्दोलन गरिरहेका सिके राउतलाई राष्ट्रिय राजनीतिको मुलधारमा ल्यायौँ,’ उनले भने, ‘उहाँहरू पनि आइसक्नु भएको छ । भाषा मिलाउनुपर्ने हुन्छ । मैले अंग्रेजले जसरी अंग्रेजी बोल्न सक्दिन । अंग्रेजले नेपालीले जस्तै नेपाली बोल्न सक्दैन । भाषा मिलाउनुपर्ने छ ।’ ओलीले अंग्रेजको लबजमा नेपाली गित पनि गाए । भने, ‘एउटा अंग्रेजले गीत गाथ्यो, ‘तिम्रो बाउ मेरो बाउ माछा मार्न गयो’ गाउन त जान्यो नेपाली भाषा समात्न सकेन । त्यसैल भाषाहरू एकत्रित गर्न गाह्रो ।’