विप्लव समूह शान्तिपूर्ण राजनीतिमा आउने प्रक्रियामा छ : सरकारका प्रवक्ता

फाइल तस्बिर

काठमाडौँ  : सरकारका प्रवक्ता तथा सञ्‍चार तथा सूचना प्रविधिमन्त्री पार्वत गुरुङले प्रतिबन्धित नेत्रविक्रम चन्द नेतृत्वको समूह शान्तिपूर्ण राजनीतिमा आउने प्रक्रियामा रहेको बताएका छन् । सोमबार सरकारको नियमित पत्रकार सम्मेलनमा बोल्दै गुरुङले विप्लवसँग छिट्टै वार्ता हुने बताएका हुन् ।  

‘हिंसात्मक गतिविधि नगरौ भन्‍ने नेपाल सरकारको आह्वान हो, सबै मूलधारमा आउनुपर्छ  । विप्लव पार्टी पनि शान्तिपूर्ण राजनीतिमा आउने प्रक्रियामा छ,’ उनले भने, ‘वार्ता नजिक–नजिक भइरहेको छ । वार्ताको टुंगो लाग्‍ने बेला सार्वजनिक हुनेछ ।’ 

उनले प्रधानमन्त्रीले आफ्नो ठाउँबाट वार्ताका लागि विप्लवलाई आह्वान गरिरहेको बताए ।  सोमबार नै पोखरामा भएको कार्यक्रममा प्रधानमन्त्री ओलीले हिंसात्मक गतिविधि छोडेर शान्तिपूर्ण राजनीतिमा आउन विप्लवलाई आग्रह गरेका थिए ।  उक्त कार्यक्रममार्फत विप्लव समूहका ५० नेता कार्यकर्ता नेकपा ओली समूहमा प्रवेश गरेका छन् ।