कांग्रेस नेता केसीको निधन

काठमाडौं : नेपाली कांग्रेसका नेता तथा प्रतिनिधिसभा सदस्य सूर्यबहादुर केसीको गएराती निधन भएको छ । गएराति पोखरास्थित घरमा ६३ वर्षका केसीको निधन भएको कांग्रेस केन्द्रीय कार्यालयका मुख्य सचिव कृष्णप्रसाद पौडेलले बताए । उनी लामो समयदेखि मधुमेह र प्रेसरका बिरामी थिए ।

राष्ट्रिय प्रजातन्त्र पार्टीबाट राजनीति सुरु गरेका केसी पछिल्लो समय नेपाली कांग्रेससँग आवद्ध थिए । पहिलाे सम्बिधानसभामा राप्रपाबाट सांसद भएका उनी २०७४ मा काङ्ग्रेस प्रवेश गरेका थिए । उनलाई नेपाली कांग्रेसले गत जेठ ४ मा गठन गरेको लगानी, पूर्वाधार र रोजगार समितिको सदस्य बनाएको थियो ।

संघीय प्रतिनिधि सभाका सदस्य माननीय सूर्यबहादुर केसीको हिजो राती १०:३० बजे पोखरास्थित आफ्नै निवासमा निधन भएको खबरले दु:ख लागेको छ । उहाँप्रति भावपूर्ण श्रद्धाञ्जलि अर्पण गर्दै शाेकसन्तप्त परिवारजनमा गहिरो समबेदना व्यक्त गर्दछु ।

— K P Sharma Oli (@kpsharmaoli) November 3, 2020

प्रतिष्ठित व्यवसायीसमेत रहेका केसीको नेतृत्वमा हिमश्री फुड्स, केसी कन्स्ट्रक्सन, माछापुच्छ्रे बैंक, सन नेपाल लाइफ इन्स्योरेन्स, हिमालयन गल्फ कोर्स, गण्डकी, भगवती र सिक्लेस जलविद्युत् जस्ता व्यवसाय स्थापित भएका हुन् । उनले शिक्षा क्षेत्रमा पनि लगानी गरेका थिए । नेपाल इन्जिनियरिङ कलेजका अतिरिक्त उनले कालिका बहुमुखी क्याम्पस स्थापना गरेका थिए ।

उनको साढे ९ बजे रामघाटमा अन्त्येष्टि गर्ने परिवारले जानकारी दिए ।