टेलिभिजनमा राजेश हमाल र दीपकराज गिरीकाे टक्कर

काठमाडौं :  लकडाउनमा एक समय कोरोना पछि केही चिज चर्चामा थियो भने त्यो थियो राजेश हमाल र दीपकराज गिरी र दीपाश्री निरौलाबीचको शीत युद्ध । एउटा टेलिभिजन अन्तर्वार्तामा दीपाश्री निरौलाले राजेश हमाललाई ‘खै संकटको समयमा कहाँ हुनुहुन्छ महानायक ?’ भनेर व्यंग्य गरेपछि राजेश हमालका फ्यान दीपक दीपामाथि खनिए ।

कुरा यति धेरै अगाडि बढ्यो कि यो उपाधि नै राष्ट्रिय बहसको विषय बन्यो । दीपाको बचावमा लाग्दा दीपक राज गिरीले पनि नराम्ररी गाली खाए । यता राजेश हमालले पनि विवादलाई साम्य पार्नुको साटो ‘मलाई महानायक भन्नै पर्छ’ भन्ने आग्रह देखिने गरी अन्तर्वार्ता दिएपछि यो विवाद निभ्न लामै समय लाग्यो ।

त्यसयता दीपक दीपा दुवैले अनौपचारिक कार्यक्रममा थुप्रै पटक राजेश हमालको पदवीमाथि असन्तुष्टि प्रकट गर्ने गरेका थिए ।तर, मनोरञ्जनको दुनियाँमा न मित्रता लामो समय रहन्छ न दुश्मनी । राजेश हमाल र दीपकराज गिरीबीचको तीतो, मीठो भएको छ कि छैन कुन्नी तर दुवै एउटै फोरममा भने देखिन थालेका छन् ।

मंगलबार राजधानीमा घोषणा भएको रवि लामिछानेको नयाँ टेलिभिजन घोषणा कार्यक्रममा हमाल र गिरी छेउछाउमा मात्र बसेनन् दुवैले एउटै टेलिभिजनमा काम गर्न लागेको पनि जानकारी दिए ।

रवि लामिछानेको नेतृत्वमा खुलेको टीभीमा राजेश हमालले ‘को बन्छ करोडपति’को दोस्रो सिजन चलाउने बताए भने दीपकराज गिरीले ‘क्राइम पेट्रोल’ ।
एउटै टेलिभिजनमा काम गरेपछि बेलाबखत जम्काभेट हुने नै भयो । यस्तो बेलामा शिष्टाचारवश हाइहेल्लो पनि गर्नै पर्यो । तर, यो क्षण दुवैका लागि सजिलो त के होला र ? 

त्योबाहेक अब दुवैको क्रेजको पनि परीक्षा हुनेछ । किनकि दुवैले एउटै टेलिभिजनमा कार्यक्रम चलाउँछन् । तुलना भइहाल्छ । दर्शकलाई भने यो टक्कर हेर्न रमाइलो होला कि पट्यार त्यो त कार्यक्रम प्रसारण हुन थालेपछि थाहा भइहाल्छ ।