कांग्रेस नेता पौडेलको जिल्ला दौडाहा : ओलीविरुद्ध आन्दोलन चर्काउन कि महाधिवेशन तयारी गर्न ?

फाइल तस्बिर

काठमाडौँ : नेपाली कांग्रेसले १४ औँ महाधिवेशन आगामी भदौ ७ गते गर्ने निर्णय गरेको भोलिपल्टै वरिष्ठ नेता रामचन्द्र पौडेल आजदेखि पूर्वी तराईको भ्रमण गर्दैछन् । शुक्रबारदेखि झण्डै एक हप्ता पूर्वी तराईका जिल्लामा हुने सभालाई सम्बोधन गर्ने कार्यक्रम बनाएका पौडेलको भ्रमण धरानबाट सुरु हुन लागेको हो । तर महाधिवेशनको मिति तय गरेको भोलिपल्टै पूर्वी तराईमा जानुलाई कांग्रेसभित्र महाधिवेशनको तयारीका लागि गएको चर्चा हुन थालेको छ ।

स्वकीय सचिव चिरञ्जीवि अधिकारीका अनुसार वरिष्ठ नेता पौडेल शुक्रबार विहान बुद्ध एयरबाट विराटनगर हुँदै सुनसरीको धरान पुग्‍नेछन् । पौडेलले धरान उपमहानगरपालिका कार्यक्रममा सहभागि भएपछि सोहि उपमहानगरपालिका निर्माण भएको वीपी पार्कको उदघाटन गर्ने कार्यक्रम छ । 

यस्तै फागुन ८ गते सुनसरीको सदरमुकाम इनरुवामा विरोध सभालाई सम्बोधन गर्ने कार्यक्रम तय भएको छ । पौडेलले फागुन ९ गते इटहरीमा कार्यकर्ता भेलालाई सम्बोधन गर्ने कार्यक्रम छ । इटहरीमा भेटघाट सकेर पौडेल फागुन ९ गते सप्तरीको राजविराज पुग्‍ने छन् । 

फागुन १० गते सप्तरीका सबै निर्वाचन क्षेत्रमा कार्यकर्ता भेलालाई सम्बोधन गर्ने छन् । सिरहा र सप्तरीको सबै कार्यक्रममा हुलाकी राजमार्ग क्षेत्रमा केन्द्रीत हुने बताइएको छ । सप्तरीमा विभिन्‍न पार्टी छोडी कांग्रेस प्रवेश गर्नेलाई स्वागत गर्ने कार्यक्रम रहेको छ । सिरहामा पौडेलले फागुन ११ गते आयोजित सिरहाका सबै निर्वाचन क्षेत्रमा आयोजित कार्यकर्ता भेलालाई सम्बोधन गर्ने कार्यक्रम रहेको छ । 

त्यस्तै फागुन १२ गते पौडेलले धनुषामा आयोजना हुने सभालाई सम्बोधन गर्ने कार्यक्रम रहेको छ । पौडेल प्रदेश १ र प्रदेश २ का विभिन्‍न जिल्लाहरुमा आयोजित आमसभालाई सम्बोधन गरी फागुन १३ गते काठमाडौं फिर्ता हुने कार्यक्रम रहेको उनको सचिवालयले जनाएको छ । 

कामचलाउ सरकारका प्रधानमन्त्री केपी शर्मा ओलीले प्रतिनिधि सभा विघटन गरेको विरोधमा सडक आन्दोलन थाल्नुपर्ने जोड वरिष्ठ नेता पौडेलको थियो । सडक आन्दोलन गर्ने विषयमा कांग्रेसमा संस्थापन पक्ष र पौडेल पक्षबीच अहिले पनि मतभेद छ । तर पौडेलकै जोडबलमा कांग्रेस प्रतिनिधि सभा विघटनविरुद्ध सडक आन्दोलनमा होमिएको थियो ।

कांग्रेस सभापति शेरबहादुर देउवाले बिहीबार पोखरामा भएको एक कार्यक्रममा कांग्रेससँग पैसा अभावका कारण जुलुस पनि निकाल्न नसक्ने बताएका छन् । ‘हामीसँग पैसा पनि छैन । जबरजस्ती बोलाउन पनि सक्दैनौं,’ कांग्रेस सभापति देउवाले भनेका थिए, ‘क्रियाशील लिने बेलामा मारामार हुन्छ, आन्दोलनमा क्रियाशीलहरु आउ भन्दा आउँदैन ।’ देउवाले आफूहरु अदालतको सम्मान गर्ने र अदालतकै निर्णय कुरिरहेको बताएका थिए ।

सोही कार्यक्रममा वरिष्ठ नेता रामचन्द्र पौडेलले जनतालाई भ्रममा नराखी नेतृत्वले आन्दोलनमा जान सक्नुपर्ने बताएका थिए । ‘अदालतले फैसला गर्दा पनि संविधानमा जे लेखेको छ, त्यही भन्‍नुपर्छ हामी किन चुप बस्‍ने ?’ उनले भनेका थिए । देउवा बोलेर सकेपछि बोलेका नेता पौडेलले कांग्रेस नेतृत्वले कार्यकर्तामा ‘कन्फ्युजन’ ल्याएको पनि बताएका थिए । नेता पौडेलले जनतालाई भ्रममा नपार्न पार्टी नेतृत्वलाई चेतावनी दिएका थिए । ‘पार्टीका नेताहरुले जनतालाई कन्फयुजनमा पार्ने ?’