राष्ट्रपतिले खुवाइन तीन राजदूतलाई शपथ

काठमाडौं : राष्ट्रपति विद्यादेवी भण्डारीले तीन मुलुकका लागि नविनियुक्त राजदूतहरूलाई आइतबार शपथ खुवाएकी छिन् । राष्ट्रपतिले तापस अधिकारी (पाकिस्तान), गोहेन्द्र राजभण्डारी (बेल्जीयम/ईयू) र रामकाजी खड्का (जर्मनी) लाई राष्ट्रपति निवासमा आयोजित एक कार्यक्रममा सपथ खुवाएकी हुन् ।

तिनै जना राजदूत परराष्टमन्त्रालयका सहसचिव हुन् । अधिकारी पुराना कूटनीतिक कर्मचारी हुन् । उनी अधिकृतका रुपमा प्रवेश गर्दै आफ्नो समुहमा अगुवा हुँदै सहसचिव भएका थिए । राजभण्डारी पनि एक दशक अघि परराष्टमा अधिकृतको रुपमा प्रवेश गरेका र प्रतिशपर्धामा उपसचिव हुँदै सहसचिव भएका हुन् । खड्का उपसचिवको रुपमा अन्तरमन्त्रालय प्रतिशपर्धाबाट परराष्ट्रमा प्रवेश गरेका र प्रतिशपर्धाबाटै सहसचिव बनेका हुन् ।

२०७७ कात्तिक ६ मा राष्ट्रपति भण्डारीले संविधानको धारा २८२ बमोजिम सरकार, मन्त्रिपरिषद्को सिफारिसमा उनीहरुलाई राजदूत नियुक्त गरेकी थिइन । सरकारले भर्खरै खाली भएको पाकिस्तान र खाली हुनै लागेको जर्मनी र बेल्जियममा राजदूत नियुक्त गरेको भएपनि श्रीलंका र दक्षिण कोरियामा लामो समयदेखि खाली रहँदा समेत राजदूत नियुक्त गरेको छैन ।

पछिल्लो समय सरकारले बेलायत, अमेरिका र दक्षिण अफ्रिकामा राजदूत सिफारिस गरेको छ । उनीहरुको संसदीय सुनुवाई र अग्रिमा (सहमति) पछिमात्र नियुक्तिको प्रक्रिया अघि बढ्नेछ । विभिन्‍न मित्रराष्ट्र र कूटनीतिक नियोगमा राजदूत भएर जानेहरुलाई २०६२/६३ पछि प्रधानमनत्रीले सपथ गराउने गरेको थियो । तर, पछि राष्ट्रपतिबाट शपथ गराउने निर्णय भएको थियो ।

संविधान जारी भएपछि पनि त्यसमा स्पष्ट पार्न सरकारले नीतिगत निर्णय नै लिएर शपथ राष्ट्रप्रमुखबाट नै गराउने निर्णय लिएको हो । यद्यपी पछिल्लो समय राष्ट्रपतिबाटै सपथ खुवाउँदै आएका थिए । गणतन्त्र अघिसम्म पनि राष्ट्राध्यक्ष अर्थात दरबारमा नै सपथ गराउने प्रचलन थियो ।