चुनावी आचारसंहिताबारे दलका नेताहरुसँग छलफल गर्दै निर्वाचन आयोग

काठमाडौँ : चुनावी आचारसंहिताबारे छलफल गर्न निर्वाचन आयोगले राजनीतिक दलका नेताहरुलाई बोलाएको छ । बैशाख १७ र २७ गते हुने चुनावका लागि आयोगले आचारसंहितामाथि दलका नेताहरुसँग छलफल गर्न लागेको हो ।

बिहान ११ बजे निर्वाचन आयोग कार्यालयमा हुने छलफलमा सबै दलका अध्यक्ष, सभापति तथा प्रतिनिधिहरुलाई बोलाइएको प्रवक्ता राज कुमार श्रेष्ठले जानकारी दिए । निर्वाचन आचारसंहिताको मस्यौदा तयार भइसकेको र दलका नेताहरुको सुझाव लिएर छिट्टै जारी गरिने प्रवक्ता श्रेष्ठको भनाई छ । 

तर सत्तारुढ नेकपाको आधिकारिक विवाद टुंग्याउन नसकेको भन्दै निर्वाचन आयोग आलोचित छ । प्रवक्ता श्रेष्ठ भने निर्वाचन आचारसंहिता र नेकपाको आधिकारिकता विवाद सँगसँगै टुंगिने दाबी गर्छन् ।

‘नेकपाको आधिकारिकता विवादबारे आयोगले अध्ययन गरिरहेको छ’ उनले इकागजसँग भने, ‘निर्वाचन आचारंसहिता जारी गर्ने काम र नेकपाको आधिकारिकता विवाद सँगसँगै टुंगिन्छ । यो काम छिट्टै हुन्छ ।'