'भागरथीको हत्यारालाई कारवाहीको दायरामा ल्याउन अपिल'

काठमाडौँ : राष्ट्रिय महिला आयोगले  भागरथी भट्टको बलात्कार र  हत्यामा संलग्न अपराधीलाई कारवाहीको दायरामा ल्याउन अपिल गरेको छ । शुक्रबार काठमडौंमा पत्रकार सम्मेलन गर्दै आयोगले घटनाको छानविनका लागि चालिएका कदम सराहनिय रहेको बताउँदै पीडित परिवारको सुरक्षा, संरक्षण र क्षतिपूर्तिका लागि सरकारसँग माग गरेको हो ।

आयोगले मानसिकरुपमा विक्षिप्त रहेकी पीडितकी आमाको सुरक्षा र संरक्षणमा विशेष ध्यान दिन आयेगले सरकारसँग अपिल गरेको छ । उक्त घटना अत्यन्त निन्दनीय, दुखद् भएको जनाउँदै घटनाको घोर भत्सर्ना गरेको आयोगकी प्रवक्ता  शान्ता अधिकारीले बताइन् । पत्रकार सम्मेलनमा आयोगकी अध्यक्ष कमला पराजुलीले महिला हिंसा न्यूनिकरणमा आयोग दिर्घकालीन योजना बनाउन लागेको जानकारी दिइन् ।

बैतडी दोगडाकेदार ७ की भागरथी भट्टको गत माघ २१ गते बलात्कार पछि  हत्या भएको थियो । स्कुल गएकी भट्ट माघ २१ गते दिउसोबाट हराएकी थिइन् । उनको सव भने २२ गते मृत अवस्थामा फेला परेको थियो । त्यसपछि २९ गते आएको पोष्टमार्टम रिपोर्टमा उनको बलात्कार पछि हत्या भएको पुष्टि भएको थियो । प्रहरीले उक्त घटनामा अनुसन्धान जारी रहेका जनाएको छ ।