भागरथी हत्या प्रकरणको अनुसन्धान तीव्र बनाऊ, दोषीलाई पक्राउ गर : कांग्रेस

फाइल तस्बिर

काठमाडौँ  :  नेपाली कांग्रेसले बैतडीको दोगडाकेदारकी किशोरी भागरथी भट्टको बलत्कारपछि हत्या गरेको घटनाको अनुसन्धान तिव्र रुपमा अघि बढाउन माग गरेको छ । कांग्रेसका प्रवक्ता विश्वप्रकाश शर्माले विज्ञप्ती जारी गर्दै अनुसन्धान तिव्र बनाएर दोषीलाई अविलम्ब पक्राउ गर्न माग गरेका हुन् । घटना भएको दुई हप्ता भइसक्दासमेत दोषीलाई पक्राउ गर्न नसक्नुलाई कांग्रेसले गम्भीर रुपमा लिएको विज्ञप्तीमा उल्लेख छ । 
 
‘शान्ति स्थापना र संविधान निर्माण पश्‍चात देशमा अमन चयन स्थापना हुनेछ र नागरिकको जीवन सुरक्षित बन्‍नेछ भन्‍ने विश्वास वितेका बर्षहरुमा कारुणिक ढंगले खण्डित हुँदै आएको छ,’ विज्ञप्तीमा भनिएको छ, ‘अनेक प्रकृतिको हिंसासँगै बलात्कार र बलात्कारपछि हत्याको जघन्य अपराध केही वर्ष यता डरलाग्दो ढंगले बढ्नु गम्भीर चिन्ताको बिषय बनेको छ ।’ 

 निर्मला पन्त प्रकरणका दोषी अझै खुला रुपमा घुमिरहेको भन्दै शर्माले भागरथी र अरु धेरैका अपराधी कानुनको कठघरामा उभिन नसकेको शर्माले भनेका छन् ।  
‘निर्मला पन्त प्रकरणका दोषी अझै कहिँ खुला घुमिरहेका छन् भने भागरथी र अरु धेरै छोरीको अपराधमा संलग्नहरु कानुनको कठघराभन्दा बाहिरै छन् । महिला उपर हिंसा र बलात्कार अनि हत्याका जघन्य अपराध बढेर जाँदा राज्यले विशेष नीति अख्तियार गर्न र प्रशासन संयन्त्रलाई थप तदारुक बनाउन सरकार समक्ष माग गर्दै नेपाली काँग्रेस यस्ता घटनाविरुद्ध सिंगो समाजको सजगताका लागि अपिल गर्दछ’ विज्ञप्तीमा भनिएको छ।