तीन वर्षभित्र क्यानडाले १२ लाख आप्रवासी भित्र्याउँदै

काठमाडौं :  क्यानडाले आगामी तीन वर्षमा १२ लाख आप्रवासी भित्र्याउने योजना सार्वजनिक गरेको छ । कोभिड-१९ को महामारीले शिथिल भएको अर्थतन्त्र उकास्न भन्दै क्यानडाले त्यस्तो निर्णय लिएको क्यानडेली स‌ंचार माध्यमहरूले उल्लेख गरेका छन् । 

आउँदो तीन  वर्षमा १२ लाख आप्रवासी भित्र्याउने योजना क्यानडाका संघीय आप्रवासन मन्त्री मार्को मेन्डिसिनोले सार्वजनिक गरेका हुन् । कोरोनाले शिथिल बनाएको अर्थतन्त्र उकास्नमा आप्रवासीले ठूलो टेवा पुर्‍याउँने भन्दै उनले यस्तो योजना सार्वजनिक गरेको जनाएका छन् । 

अर्थतन्त्र उकास्न आवश्यक पर्ने ठूलो जनशक्ति आप्रवासनद्वारा परिपूर्ति गरिने योजनामा उल्लेख छ । आउँदो वर्ष चार लाख एक हजार, २०२२ मा  चार लाख ११ हजार र २०२३ मा चार लाख २१ हजार आप्रवासीलाई स्थयी आप्रवासन अनुमति (पीआर) दिइने गरी तयारी थालिएको मन्त्री मेन्डिसिनोले बताए ।