अस्ट्रेलियन ओपनः विलियम्स र मुगुरुजाको स्वभाविक जित

काठमाडौँ  :  अस्ट्रेलियन ओपनमा सेरेना विलिम्यम्सले जितलाई निरन्तरता दिएकी छिन् । तेस्रो चरणको खेलमा विजय हासिल गर्दा टेनिस स्टार विलियम्सले १९ वर्षिय रुसी खेलाडी एनसटासियालाई पराजित गरिन । शुक्रबार अंग्रेजी वर्षको पहिलो ग्रान्डस्लामको चौथौँ चरणमा स्थान सुरक्षित गर्ने क्रममा विलियम्सले एनसटासिया माथि ७- ६, ६- २ को जित दर्ता गरिन् । युवा खेलाडी एनसटासियाले पहिलो सेटमा निरन्तर गल्ती गर्दा विलियम्सले विजय प्राप्त गरिन् ।

‘सुरुवात राम्रो नभए पनि खेलमा सुधार गर्दै गए । प्रतियोगितामा प्रत्येक राउण्डमा बलियो हुँदै जानुपर्छ । यो खेलको सामान्य नियम हो । अनि महत्वपूर्ण पनि,’ खेलपछि विलियम्सले भनिन् । २४ औँ ग्रान्डस्लाम जित्दै कीर्तिमान रच्ने धेयमा रहेकी विलियम्सले क्वाटरफाइनल प्रवेशका लागि बेलारुसकी एरिना सावालेन्काको समाना गर्नेछिन् । चौथौँ चरणमा स्थान पक्का गर्न सावालेन्काले अमेरिकी खेलाडी एन लीलाई ६- ३, ६- १ पराजित गरिन् । पछिल्ला १९ खेलमध्ये १८ मा जित हासिल गरेकी सावालेन्काले यसअघि विलियम्सको सामना गरेकी छैनन् ।

‘हामी सबै यस प्रतियोतिामा जितको लक्ष्यका साथ नै आएका छौँ । त्यसकारण विपक्षी जती बलियो भए पनि कोर्टमा उत्रदा जित्नकै लागि खेल्ने हो । विलियम्सको सामना गर्नपाउनु चानचुने कुरा होइन । म त्यसका लागि तयार छु । अनि उत्साहित पनि,’ सावालेन्काले भनिन् । 

शुक्रबारै भएको अर्को खेलमा जित दर्ता गर्दै गारविन मुगुरुजाले पनि चौथौँ चरणको यात्रा तय गरिन् । गत वर्षकी उप- विजेता मुगुरुजाले कजाकिस्तानकी जरिना डियासलाई ६- १, ६- १ ले पराजित गरिन् । अन्तिम आठमा स्थान बनाउन मुगुरुजा २०१९ संस्करणकी विजेता नाओमी ओसाकासँग भिड्नेछिन् ।