ट्रक र मोटरसाइकल जुध्‍दा दुईको मृत्यु

धादिङ : धुनीबेंसी नगरपालिका खानीखोलामा बिहीबार ट्रक र मोटरसाइकल ठोक्किदा दुई जनाको मृत्यु भएको छ ।  धादिङबाट काठमाडौँतर्फ जाँदै गरेको प्र ३ ०२ ००९ प ८२३० नम्बरको मोटरसाइकल  विपरीत दिशातर्फ जाँदै गरेको ना १ क ६५४७ नम्बरको ट्रकसँग जुधेको थियो । 

दुर्घटनामा धादिङ, नीलकण्ठ नगरपालिका वडा नम्बर ५ का ६० वर्षीय बलराम अधिकारी र उनका छोरा ३० वर्षीय डा सुरेश अधिकारीको मृत्यु भएको जिल्ला प्रहरी कार्यालय धादिङका प्रमुख प्रहरी उपरीक्षक महेन्द्र खड्काले जानकारी दिए । दुर्घटनापछि मोटरसाइकलमा आगलागी भएको तथा मोटरसाइकल चालक डा अधिकारी र उनका बाबु घाइते भएका थिए  । 

घाइते उनीहरूको उपचारका लागि अस्पताल लैजाँदै गर्दा मृत्यु भएको प्रहरी उपरीक्षक खड्काले जानकारी दिए । सवारी साधन उछिन्‍न लाग्दा दुर्घटना भएको प्रत्यक्षदर्शीले बताएका छन् । (रासस)