पक्राउ गर्न लगाउनु राज्य आतंक हो : झाँक्री

काठमाडौँ : पक्राउ गर्न प्रहरी घरमै आएपछि नेकपा दाहाल नेपाल समूहकी नेतृ रामकुमारी झाँक्रीले सरकारले राज्य आतंक मच्चाएको बताएकी छिन् । शंखमुलमा बाहिर प्रहरी पक्राउका लागि पुगेपछि पत्रकारसँग प्रतिक्रिया दिँदै नेतृ झाँक्रीले बोलेकै आधारमा पक्राउ गर्न लगाउनु राज्यले आतंक मच्चाएको बताएकी हुन् ।

उनले प्रधानमन्त्री केपी शर्मा ओली र राष्ट्रपति विद्यादेवी भण्डारीको प्रतिनिधि सभा विघटन गर्ने कदमविरुद्ध आफुले सधै प्रतिवाद गर्ने पनि बताइन् । प्रतिनिधि सभा विघटन गरेर आफुलाई सडकमा जान बाध्य पार्ने राष्ट्रपति भण्डारी र प्रधानमन्त्री ओलीविरुद्ध बोल्न नछाड्ने समेत उनले बताइन् ।

झाँक्रीलाई पक्राउ गर्न घरमै प्रहरी पुगेको छ । तर नेकपाका नेता कार्यकर्ताले झाँक्रीलाई पक्राउ पर्न नदिन प्रहरीलाई घरभित्र छिर्न दिएका छैनन् । राष्ट्रपति विद्यादेवी भण्डारीलाई गालीगलौज गरेको आरोपमा प्रहरीले झाँक्रीलाई पक्राउ गर्न लागेको हो ।