राष्टसंघद्वारा फ्रान्समा भएको आतंककारी हमलाको निन्दा

काठमाडौं  : राष्ट्रसंघले फ्रान्सको निस सहरमा भएको आतंककारी हमलाको निन्दा गरेको छ । राष्ट्रसंघका महासचिव एन्टोनियो गुटेरसले बिहीबार भएको आतंककारी हमलाको  निन्दा गरेका हुन् । फ्रान्सको निस सहरमा बिहीबार चक्कुले हमला गरी एकजना व्यक्तिले तीन जनाको बर्वरतापूर्वक हत्या गरेको थियो । धारिलो हतियार प्रयोग गरेर हत्या गर्ने ब्राहिम औसाउईलाई पक्राउ गरिएको फ्रान्सको सुरक्षा निकायले जनाएको छ । ‘अल्लाह हु अकबर’ भन्दै आक्रमणमा उत्रिएका ब्राहिमलाई प्रहरीले १४ राउन्ड गोली प्रहार गरेर नियन्त्रणमा लिएको हो ।

२१ वर्षीय टुनिसियिन मूलका ब्राहिम शरणार्थीको डुंगा चढेर यही महिनामात्र फ्रान्स आइपुगेको अनुसन्धानले देखाएको छ । प्रत्यक्षदर्शीका अनुसार उनी धारिलो हतियार सहित नोट्रे डाम चर्चमा प्रवेश गरेका थिए । उनले त्यहाँ एक वृध्द महिलाको टाउको छिनालेका थिए । त्यसपछि उनले ५४ वर्षीय भिन्सेन्स लोक्‍केसको घाटी रेटी हत्या गरेका थिए । छूरी आक्रमणबाट घाइते बनेकी ४४ वर्षीया सिमोन बरोटा सिल्भा भने भाग्दै एक रेस्टुरेन्टमा पसीन तर उनको त्यहाँ पुगेसँगै ज्यान गयो ।

नियन्त्रण पछि उपचारार्थ अस्पताल लगिएका ब्राहिम विहान साढे छ बजे ट्रेनबाट निस सहर पुगेका थिए । सीसीटिभी फुटेज नियाल्दा उनी कपडा बदलेर साढे आठ बजे चर्च पुगे । त्यहाँ आधाघण्टा बसेपछि त्यस्तो क्रुर हत्या गरेका सञ्‍चार माध्यमहरूले जनाएका छ्न् । ब्राहिम गत सेप्टेम्बर २० मा इटालीको टापु लाम्पेडुसा आइपुगेका थिए । पेरिसमा उनी गत अक्टुबर ९ मा आइपुगेको पनि अन्तराष्ट्रिसमाचार संस्थाहरुले जनाएका छन । एपी/एएफपी/सीएनएनले घटनाको बारेमा विभिन्‍न कोणबाट अध्ययन अनुसन्धान भइरहेको उल्लेख गरेका छन् ।

छूरी हमलाबाट गरिएको बर्बर हत्या आतंककारी हमला हो भन्दै महासचिव गुटेरसले त्यसमा संलग्‍नहरूलाई कडाभन्दा कडा कारवाही गर्नपर्ने बताएका छन् । हमला आतंककारीद्वारा गराएको हो भन्दै यस्ता घटनाका दोषीलाई कानुनी कारवाहीको दायरामा ल्याउन पर्ने उनको धारणा रहेको प्रवक्ता स्टेफन डुजारिकद्वारा जारी विज्ञप्तिमा उल्लेख छ ।

महासचिव गुटेरसले मृतकका आफन्तहरुलाई समवेदना पनि प्रकट गर्दै आतंककारीका विरुध्दको संघर्षमा राष्ट्रसंघ सधैँ फ्रान्सेली सरकारको साथमा रहेको पनि उल्लेख गरेका छन् । फ्रान्सको निस सहरमा यसअघि पनि आतंककारी हमला भएको थियो । त्यसमा परेर कैयौं नागरिकको ज्यान गएको थियो ।

चार्ली हेब्डो नामक पत्रिकाले प्रोफेट मोहम्मदको कार्टुन प्रकाशित गरेपछि अलकायदाले ‘जिहाद’ छेड्ने बताउँदै थप आक्रमण गर्ने चेतावनी दिएको थियो । केही दिनअघि मात्र  कार्टुन विद्यार्थीहरुलाई देखाएको आरोपमा एक शिक्षकको विभत्स हत्या गरिएको थियो । फ्रान्समा यतिबेला सम्भावित आतंकवादी हमलालाई मध्यनजर गर्दै सुरक्षा सतर्कता बढाइएको छ ।