प्रधानमन्त्री ओलीको आँशुमा पनि सूर्य थापाको राजनीति !

काठमाडौँ : शुक्रबार नेकपा ओली समूहले नारायहिटीमा शक्ति प्रदर्शन गर्‍यो । शक्ति प्रदर्शनमा प्रमुख वक्ता थिए नेकपाका अध्यक्ष तथा कामचलाउ सरकारका प्रधानमन्त्री केपी शर्मा ओली । उखान टुक्‍का मिलाएर भाषण गर्न माहिर ओलीको मन्त्वयको क्रममा कार्यकर्ता हुटिङ गरे । अन्य बेलामा झैँ ओलीले शुक्रबारको शक्ति प्रदर्शनमा उखान टुक्का प्रयोग गरेनन्, बस् भाषण भने चर्को गरे ।

त्यसोत अरु दिनको तुलनामा मौसम चिसो थियो । पानी बेलाबेलामा छिट्‍याउथे र रहन्थ्यो । सिरेटोले एकनासै हानिरहेको भने थियो । ओलीको भाषण नै पिच्‍छे कार्यकर्ताले हुटिङ गरिररहे । बेलाबेलामा ओलीले हुटिङलाई हात हल्लाएर समर्थन जनाउँथे र शान्त हुन आग्रह गर्थे । भाषण गर्दागर्दै प्रधानमन्त्रीले पानी पिए र लगाएको कालो चश्मा खोलेर आँशु पुछे । र उनले भाषणमै भने 'चिसोले आँखामा नि आँशु आयो ।' प्रधानमन्त्री ओलीले यसो भनिरहँदा पनि उनका कार्यकर्ताले हुटिङ गर्न छाडेका थिएनन् ।

तर प्रधानमन्त्रीका प्रेस सल्लाहकार सूर्य थापाले केही बेरमै ट्‍वीट गरे प्रधानमन्त्री ओलीको साथमा जनता देखेर भावुक हुँदै आँशु खसाले । 'नारायणहिटी संग्रालय गेट अगाडिको जनसागर । प्रधानमन्त्री केपी शर्मा ओलीले जनताको साथमा भावुक बन्दै आँशु नै खसाल्‍नु भयो । जनता साथमा भएपछि कोही दुष्टहरूको पनि केही चल्‍दैन । चेतना भया !'

ओलीले अब मांसाहारी आन्दोलन हुन सक्दैन भन्दै चुनौती दिएका थिए । ‘साकाहारी आन्दोलनले हुँदैन भनेर के भनेको ? चिकनचिल्ली खान्छु भनेको हो ? नरभक्षी आन्दोलन गर्छु भनेको हो ?’ उनले भनेका थिए, ‘अब त्यस्ता दिन गए । यहाँ कसैले नरभक्षी आन्दोलन चलाउँछु भन्ने कसैले नसोचे हुन्छ ।’

त्यस्तै ओलीले प्रतिनिधि सभा विघटन संविधान संवत् भएको बताएका थिए । ‘अहिले देशव्यापी बहस भइरहेको छ । विघटनको सिफारिस संवैधानिक छ कि छैन ? जनताले बुझेको कुरा हो । विघटन गर्नु संवैधानिक छ कि छैन,’ उनले भनेका थिए, ‘म भन्‍न चाहन्छु । संसदीय प्रणालीमा काम गर्न नपाउने अवस्था भयो भने प्रधानमन्त्रीले विघटन गर्न सक्छ । प्रधानमन्त्रीले संसद् विघटन गर्छ । ताजा जनादेश लिनुपर्छ । हाम्रै बलमा संसद्‍मा आएर हामीलाई नै काम गर्न नदिने ?'

‘तीन वर्षसम्म आयोग बनेनन् । दुई चार जना पार्टी छोडेर गएपछि आयोगहरु बने,’ उनले भनेका थिए, ‘चुनाव भएको तीन वर्षपछि बल्ल आयोग बने । ती मान्छे छउन्जेलसम्म आयोग गठन गर्न सकेनौं । बनेको भोलिपल्ट नेपाल बन्द । समस्या उठाउँनै नहुने । आयोग बन्‍न नदिने कस्तो षड्यन्त्र ।’ 

‘हिजो द्वन्द थियो । लडाकुहरू जसलाई जनवाद आउने सुन्दर सपना बाडेर लडाइयो । तिनीहरू आज पीडित छन् । उनीहरूले सहादत प्राप्त गर्नु पर्‍यो । परिवार बेसहारा भयो । द्वन्द कालमा पीडित भएकाको हेरचाह गर्नका लागि सरकारले समिति बनाएको छ । सबैको हेरचाह गर्नछ । घाइतेको स्वास्थ्यको प्रवन्धन सरकारले गर्नेछ । रोजगारको व्यवस्था सरकारले गर्नेछ,’ उनले भनेका थिए ।