नेपालकी अभिलाषा र जर्मनीकी सोन्जा पहिलो

काठमाडाैँ : विश्‍व टेनिस टुर-जे ५ को पहिलो सर्किटअन्तर्गत महिला डबल्सतर्फ नेपालकी अभिलाषा विष्ट र जर्मनीकी सोन्जा जियेन्बायेभाको जोडी पहिलो भएको छ । ललितपुरको सातदोबाटोस्थित टेनिस कोर्टमा शुक्रबार भएको खेलमा विष्ट र सोन्जाको जोडीले बेल्जियमकी काट कोपेज र मार्ते लाम्ब्रेचको जोडीलाई ६-० र ७-५ अङ्कले पराजित गरेको हो ।

नेपाल टेनिस सङ्घले आयोजना गरेको उक्त प्रतियोगिताको पुरुष डबल्सतर्फ भने फाइनलमा नेपाली खेलाडीले पराजय भाेग्‍नुपर्‍याे । भारतीय जोडी आर्यन लक्ष्मण र आर्यन शाहको जोडीले नेपालका आरभसम्राट हाडा र अकी जुवेन रावतको जोडीलाई २-६, ६-२ र १०-६ अङ्कले पराजित गरे । यस्तै पुरुष एकलतर्फको खेलमा भारतकै अमन दहिया र स्पेनका टोमस क्युसेडा पेरेज फाइनलमा प्रवेश गरेका छन् । 

दहियाले फ्रान्सका भेलेन्टिन फाउरेलाई ६-१ र ६-१ अङ्कले तथा पेरेजले भारतका अग्रिया यादवलाई ६-४ र ६-२ अङ्कले हराउँदै फाइनलमा स्थान बनाएका हुन् । महिला एकलतर्फ बेल्जियमका मार्ते लाम्ब्रेज र रोमाने लन्ग्युभिल्ले पनि फाइनलमा प्रवेश गरेकाे आयोजक सङ्घले जनाएको छ । मार्तेले अमेरिकाकी साइना देशपाण्डेलाई २-६, ६-१ र ६-३ अङ्कले तथा रोमानेले अमेरिकाकै रुतुजा छप्हल्करलाई ७-५ र ६-४ अङ्कले पराजित गरे । फाइनल खेल शनिबार हुनेछ ।