जनप्रतिननिधिले नै एम्बुलेन्स बिक्री गरेपछि . . .

काठमाडौँ  : अशक्त एवं असहाय बिरामीलाई सहज रुपमा अस्पताल र स्वास्थ्य संस्थासम्म पुर्‍याउन, जीवन बचाउन खरिद गरिएको एम्बुलेन्ससमेत बिक्री गरेको भन्दै मोरङको बेलबारी नगरपालिकाका नागरिकले गुनासो गरेका छन् । लायन्स क्लब अफ बेलबारीले सामाजिक हितका लागि खरिद गरिएको एम्बुलेन्स जनप्रतिनिधिलगायतको मिलोमतोमा बिक्री गरिएकामा संस्थाकोसमेत बेइज्जती भएको क्लबका अध्यक्ष खेमप्रसाद गौतमले पत्रकार सम्मेलन गरी बताएका छन् ।  

लायन्स क्लब बेलबारीले सन् २०११ मा सांसद विकास कोषको रु तीन लाख र क्लबका अन्य सदस्यबाट रकम सङ्कलन गरी राजश्‍व छुटमा रु ११ लाखमा  खरिद गरिएको को १ च ५७९४ नम्बरको टाटा सुमो सेतो रङको एम्बुलेन्स विसं २०७० मा नगरपालिकाका हालका प्रवक्ता तथा वडा नं-३ का अध्यक्ष योगेन्द्र सुवेदीको संयोजकत्वमा बिक्री समिति बनाएर बिक्री गरिएको थियो । एम्बुलेन्स बिक्री भएपछि हरेक वर्ष क्लबका अध्यक्ष परिवर्तन भए पनि  यसको खोजी नभएको र सन् २०२० मा  आफू नेतृत्वमा आएपछि खोजी गरिएको गौतमले बताए ।  

पटक/पटक पुरानो समितिलाई यसबारे जानकारी माग्दा बेवस्ता गरेर कुनै जवाफ नपाइएको उनको भनाइ छ । गरीब तथा असहायको सामाजिक कार्यका लागि खरिद गरिएको उक्त एम्बुलेन्स अविलम्ब क्लबलाई फर्काउने व्यवस्थाका लागि सबैसँग अध्यक्ष गौतमले आग्रह गरे ।  रासस