कटुवा पेस्तोलसहित दुई युवक पक्राउ

जनकपुरधाम : सिरहा प्रहरीले कटुवा पेस्तोलसहित दुई युवकलाई पक्राउ गरेको छ । बिहीबार बिहान जिल्लाको कर्जन्हा नगरपालिका-२ बन्दीपुर बजारबाट सवारी चेकजाँचको क्रममा एक थान कटुवा पेस्तोल, त्यसमा लाग्ने गोली एक थान र लागू औषध नाइट्रोभेटसहित पक्राउ गरेको हो ।

इलाका प्रहरी कार्यालय बन्दीपुरबाट खटिएको प्रहरी टोलीले सवारी चेकजाँचको क्रममा स.७ प.२५५३ नम्बरको मोटरसाइकलमा सवार स्थानीय २२ वर्षीय युवक डिम्पल यादवको साथबाट सो हतियार र लागूऔषध बरामद गरिएको जिल्ला प्रहरी कार्यालय सिरहाले जनाएको छ ।

प्रहरीले डिम्पललाई नियन्त्रणमा लिई सोधपुछ गर्दा घटनामा स्थानीय २२ वर्षीय प्रेमनाथ यादवको समेत संलग्नता रहेको खुल्न आएपछि उनलाई पक्राउ गरिएको कुरा प्रहरी नायब उपरिक्षक शालीग्राम शर्माले बताएका छन् । उनको साथबाट फेला परेको हतियार, लागूऔषध र प्रयोग भएका गाडीसमेत नियन्त्रण लिई आवश्यक अनुसन्धान प्रक्रिया अघि बढाइएको शर्माले जानकारी दिए ।