दाहाल-नेपाल गठबन्धन अपवित्र छ : ईश्‍वर पोखरेल

फाइल तस्बिर

काठमाडौँ  : नेकपा ओली पक्षका सचिवालय सदस्य एवं उपप्रधानमन्त्री ईश्‍वर पोखरेलले दाहाल-नेपालबीचको गठबन्धन अपवित्र रहेको बताएका छन् । बिहीबार नेकपा बागमती प्रदेश कमिटीद्वारा आयोजित स्वयंसेवक अभिमुखीकरण कार्यक्रमलाई सम्बोधन गर्दै पोखरेलले माधव नेपालले सधैँ पार्टीभित्र कुण्ठामात्र पाल्ने गरेको भन्दै दाहाल नेपालको गठबन्धन अपवित्र रहेको बताएका हुन् ।   

उनले माधव नेपालको विचारहरु कुण्ठाको भारी बोकेको एउटा पात्रले बोल्ने बिचार रहेको बताए । अन्तरविरोधमा खेल्ने दाहाल र कुण्ठामा रमाउने माधव नेपालको गठबन्धनलाई पराजित गर्दै लैजाने उनको दाबी छ । पोखरेलले सानातिना समस्यालाई पाखा लगाएर पार्टी एकीकरण नै गराउन प्रधानमन्त्री केपी शर्मा ओली सफल भए पनि सरकार र पार्टीलाई आफ्नै  नेताहरुबाट असहयोग मात्र मिलेको बताए ।  

उनले पार्टीमा भागबण्डा खोजेकै कारण संवैधानिक आयोगमा लामो समय नियुक्त गर्न नसकिएको भन्दै दाहाल–नेपाल पक्ष बाहिरिएसँगै सहज रुपमा आयोगले पूर्णता पाएको पनि बताए ।