भन्सार छलेको  २२ लाख बढीको सामाग्री बरामद

प्रहरीले बरामद गरेको सामान

जनकपुरधाम : धनुषा प्रहरीले भन्सार छलेर भारतबाट ल्याएको २२ लाख रुपैयाँभन्दा बढी मूल्य बराबरको खाद्य पदार्थ र लत्ताकपडासहितको सामाग्री बरामद गरेको छ । सुरक्षा गस्तीमा खटिएको प्रहरी टोलीले जिल्लाको विभिन्‍न स्थानबाट २२ लाख ८७ हजार ५ सय ९० रुपैयाँ मूल्य बराबरको भन्सार छलेर भारतबाट ल्याएको सामाग्री बरामद गरेको हो ।

जिल्ला प्रहरी कार्यालय धनुषाका प्रहरी नायब उपरीक्षक मकेन्द्र मिश्रले सीमावर्ती क्षेत्र नगराइन नगरपालिकाको जटहीबाट १० लाख २७ हजारभन्दा बढीको लत्ताकपडा र भाडा तस्करहरूबाट नियन्त्रणमा लिइएको जानकारी दिए । 

त्यसैगरी जनकनन्दनी गाउँपालिका १ निवासी कमली देवीको घरबाट भन्सार छलेर ल्याएका पान मसला राजनिवास, काठ रंग्‍ने चपरा, फलफूल पकाउने कार्बेट र एकथान मोटरसाइकलसहित १० लाख मूल्यभन्दा बढीको सामाग्री छापामारी गरी बरामद गरिएको उनले जानकारी दिए । 

शहीदनगर नगरपालिका ६ बाट सादा पोशाकमा खटिएको प्रहरी टोलीले सुतीको साडी, गम्छा, लेडिज सुट पिसलगायतका कपडा र मोटरसाइकलसहित साढे लाखभन्दा बढी मूल्य बराबरको सामाग्री पनि बरामद गरिएको प्रहरीले जनाएको छ । 

बरामद गरिएका सबै सामाग्री आवश्यक कारवाहीका लागि भन्सार कार्यालय जनकपुरधाममा बुझाइएको मिश्रले जानकारी दिए ।  चाडपर्व नजिकदै जाँदा भन्सार छली गरी भारतबाट खाद्य पदार्थ र लत्ता कपडासहितका सामाग्रीको चोरी पैठारी बढन  थालेपछि प्रहरी सक्रियता बढाएको हो ।