सुकुम्बासीका समस्या समाधान गर्न माधव नेपालले अवरोध गरे : प्रधानमन्त्री ओली

फाइल तस्बिर

काठमाडौँ  :  प्रधानमन्त्री केपी शर्मा ओलीले सुकुम्बासी समाधान गर्ने सकारको प्रयासमा अवरोध गर्नेकाम भइरहेको बताएका छन् ।  भूमिहिन सुकुम्बासी संगठन केन्द्रीय कमिटीले काठमाण्डौमा बुधबार आयोजना गरेको राष्ट्रिय भेलालाई सम्बोधन गर्दै प्रधानमन्त्री ओलीले माधव कुमार नेपालले सुकुम्बासी समस्या समाधान गर्ने सकारको प्रयासमा बाधा पुर्याएको आरोप लगाएका हुन् । 

माधव कुमार नेपाललाई भूमि व्यवस्था समाधान हुन नदिने नेताको संज्ञा दिदै ओलीले पार्टी छोडेर गएपछि मात्रै आयोगले काम गर्न थालेको दाबी गरे । ‘अघिल्लो पटक म प्रधानमन्त्री हुँदा समस्या समाधान गर्न खोजियो । माधव नेपालले आफ्नो एउटा समर्थक वकिललाई लगाएर मुद्धा लगाएर लच्चिएको लच्चियै काम हुन पाएन,’ ओलीले भने ।  

ओलीले नेपाललाई व्यंग्य गर्दै खिल्ली पनि उँडाए । ‘भूमि व्यवस्था समाधान हुन नदिने विषयमा एउटा हाजिरी जवाफ प्रतियोगिता जस्तो चलाइहालुँ । तपाईहरुला म सोध्छु । सुकुम्बासी समस्या समाधान हुन नदिने नेताहरु मध्येको मुख्य नेता को हो ?’ ओलीले भने, ‘माधव नेपाल ।’  प्रधानमन्त्री ओलीले माधव नेपाल, नारायणकाजी श्रेष्ठ र घनश्याम भुसालले सरकारलाई काम गर्न नदिएको भन्दै उनले ‘छलफलवाला मान्छे’ को संज्ञा दिए ।

‘माधव नेपाल र नारायणकाजी भन्ने दुई जना मान्छे पार्टीमा थिए । तीनीहरु सबै छलफल हुनुपर्छ भन्ने । जतिबेला पनि छलफल हुनुपर्छ भन्ने । छलफलवाला मान्छे मैले नेपालमा भेटाएको ३ जना मान्छे,’ उनले भने, ‘एउटा माधव नेपाल, अर्को नारायणकाजी श्रेष्ठ, अर्को घनश्याम भुसाल । जहिले जे मा पनि छलफल हुनुपर्छ । छलफल गर्नुपर्छ । सुकुम्बासी आयोग बनाऔ । छलफल गर्नुपर्छ । बनायो । किन बनाईयो ? छलफल हुनुपर्छ । पुर्णता दिउँ । छलफल हुनुपर्छ । प्रतिनिधि मागौँ । होइन छलफल हुनुपर्छ । छलफलवाला मान्छेहरुले पार्टी छोडे पाटीतिर लागे । तिनीहरुको पाटीको बास हुन थालेपछि आयोग बन्यो । पूर्णता पाएको छ । काम बन्छ ।’ 

उनले पार्टीमा सुद्धिकरण आवश्यक रहेको र सुद्धिकरण आवश्यक रहेकाहरु आफैँ किनारा लागेको बताए । । पार्टी छोडेर पाटीमा गएकाहरुले आफ्नो अभिष्ट पुरा गर्न नेपाल बन्द गरेर जनतालाई दुख दिने काम गरेको टिप्पणी गरे ।  ‘उनीहरु किन छटपटाएका छन् ? नेपाल बन्द रे ? जनताले के बिगारेको थियो र ? जनतालाई किन दुख दिनुपर्यो नेपाल बन्द गरेर ? पार्टी छोडेर आफुहरु पाटीमा लाग्छन् । अनि बन्द गरेर जनतालाई दुख दिने ?बन्द भन्या के ? हिडडुल गर्न नपाउने । बन्द भन्या के ?,’ उनले भने, ‘पसल खोल्न नपाउने । किन्न जान नपाउने । पढ्न जान नपाउने । बन्द भनेको जनतालाई दुख दिने । त्यो किन गर्नुपरेको छ ? के का लागि गर्नुपर्यो बन्द ?’