निर्वाचन आयोग खर्चालु हुँदैछ.... ?

काठमाडौं : सरकारद्वारा घोषित चुनावको मिति आउन अब ८६ दिन बाँकी छ । यतिखेर निर्वाचन आयोगले चुनावका लागि ४ करोड रुपैयाँ हाराहारीमा खर्च गरिसकेको छ । त्यो रकम आयोगले मतदाता नामावली र मतदान केन्द्रका निम्ति खर्च गरेको हो ।

उसले केही दिनभित्रै चुनाव खर्च बाँडफाँडसहित रकम निकासा निम्ति अर्थ मन्त्रालयलाई प्रस्ताव पठाउँदैछ । त्यसअतिरिक्त आयोग निर्वाचन सामाग्री खरिदका निम्ति टेण्डर आह्वान गर्ने तयारीमा छ ।

यद्यपि प्रतिनिधि सभा विघटनका हकमा सदर÷बदर के हुन्छ भन्ने अन्यौलका कारण खर्च शैलीलाई अलि सुस्त बनाएको छ । ‘सरकारद्वारा घोषित समयकै निम्ति चुनावी काम अघि बढाउनुपर्ने हुँदा’ आयोगका एक पदाधिकारी भन्छन्, ‘समय नजिकिने क्रमसँगै खर्चको गति तीव्र हुन्छ । चुनावसँगै आयोग खर्चालु हुन्छ नै ।’

अदालतको फैसलापछि एक महिनापछि हुने हो भने र प्रतिनिधि सभा पुनस्र्थापना भएको खण्डमा २० करोड रुपैयाँ क्षति भइसकेको हुन्छ । ‘त्यो क्षतिको जिम्मा कसले लिने ?’ आयोगका एक पदाधिकारीले भने, ‘अब टेण्डर आह्वान गरी सामान खरिदको प्रक्रियामा जानुपर्छ । टेण्डर आह्वान गरी सामान खरिद प्रक्रियामा लागेपछि ठेकेदारले दाबी गर्छ नै ।’