तातोपानी नाका खुल्यो, भोलिदेखि व्यापार सुचारु हुने

काठमाडौं : चीनसँगको व्यापारिक नाका तातोपानी आजदेखि खुल्ला भएको छ । तातोपानी भन्सार कार्यालयका प्रमुख लालबहादुर खत्रीका अनुसार, चिनियाँ पक्षले आजदेखि औपचारिक रुपमा नाका खोलेको भएपनि बिहीबारदेखि मात्र भन्सार चेकजाँच भइ आयात–निर्यात सुचारु हुनेछ । 

चीनबाट आयातीत सामान चीनको झाङ्बु नाकामा जाँचपास गराउन खटिएका एकजना क्लीयरिङ एजेन्टलाई कोरोना भाइरस पोजिटीभ देखिएपछि असोज १८ देखि उक्त नाका बन्द थियो । जसका कारण दसैंलाई लक्षित गरी ल्याइएका सामान तिब्बतको नाकामा रोकिएका छन् ।

२०७२ सालको भूकम्पले बाटो र भवनमा क्षति पुर्‍याएको भन्दै चीनले लामो समय उक्त नाका बन्द गरेको थियो । २०७६ जेठबाट सञ्चालनमा ल्याउने औपचारिक घोषणा भएपनि साउनदेखि व्यापार सुचारु भएको थियो । चीनमा कोरोना भाइरसको संक्रमण विस्तार भएपछि गत वर्ष माघ १३ देखि उक्त नाका बन्द थियो ।

चैत अन्तिमदेखि अत्यावश्यक सामग्री भित्र्याउन नाका खोल्ने सहमति भएपनि कोभिड–१९ को असरका कारण व्यापारिक प्रयोजनका सामग्रीको आयात निर्यात भने खुलाइएको थिएन । गत असार २४ मा बाढीपहिरोपछि त नाका पूर्ण रुपमा बन्द नै थियो । 

तातोपानी भन्सार कार्यालयका प्रमुख खत्रीले चिनियाँ ट्रक, कन्टेनरमै नेपाली भन्सारको यार्डसम्म ल्याउने र त्यहीं अनलोड गर्ने व्यवस्था भएको बताए । यो व्यवस्थाले सामान अनलोड गर्न नेपालीहरु तिब्बती बन्दरगाहसम्म जानुपर्दैन । 

तातोपानी नाका चीनसँगको व्यापारमा प्रयोग हुँदै आएको रसुवागढी नाकाभन्दा चल्तीमा रहँदै आएको थियो । तर २०७२ सालको भूकम्प र सिन्धुपाल्चोकमा पुनःनिर्माण र पुनस्र्थापनामा पश्चिमा सहयोग बाक्लिएपछि भने चीनले उक्त नाका खुलाउन चासो दिएको थिएन । दुइ देशबीच उच्च राजनीतिक स्तरको छलफलमा समेत कुरा उठेपनि चीनले एकैपटक २०७६ साल जेठदेखि उक्त नाका खुलाएको थियो ।