‘पेपे आर्सनलका लागि उपयुक्त खेलाडी होइनन्’

काठमाडौँ : आर्सनलका पूर्व खेलाडी रोबर्ट पियरेसले निकोलस पेपे प्रिमियर लिगका लागि उपयुक्त खेलाडी नभएको बताएका छन् । बेलायतको अखबार दि सनसँग शनिबार कुरा गर्दै पियरेसले आर्सनलका विङ्गर पेपेसँग इंग्लिस लिगका लागि चाहिने कौशल नभएको बताएका हुन् ।

‘पेपे प्रिमियर लिगका लागि उपयुक्त छैनन् । प्रिमियर लिगमा तीब्र गतीका फरवार्डहरु मात्रै सफल हुन सकछन् । पेपे त्यस्तो प्रकारको खेलाडी होइनन् । उनलाई इंग्लिस फुटबलमा स्थापित हुन सजिलो छैन,’ पियरेसले भने । सन् २०१९ मा फ्रेन्च क्लब लिलबाट आर्सनल आएका पेपेले अपेक्षाकृत खेल्न सकेका छैनन् । २५ वर्षीय फरवार्डले आर्सनलको जर्सीमा ६६ खेल खेल्दा १४ गोल र १३ असिस्ट मात्रै दर्ता गरेका छन् ।

‘पेपेले आर्सनलमा टिक्ने हो भने मानसिकता परिवर्तन गर्नुपर्छ । इंगल्यान्डमा गराइने अभ्याससँग अभस्त हुनुपर्छ । उनले आफुलाई परिवर्तन नगराई इमिरेट्स रंगशालामा धेरै समयसम्म टिक्न सकने छैनन्,’ सन् २००२ बाट २००६ सम्म आर्सनलबाट खेलेका पियरेसले थपे ।

आर्सनलले पेपेलाई अनुबन्ध गर्न करिब ७२ मिलियन पाउण्ड खर्च गरेको थियो । तर मिकेल आर्टेटाको टिममा पेपेले कुनै प्रभाव पार्न सकेका छैनन् । जसले गर्दा क्लब प्रशासन देखि सर्मथकसम्म निराश बनेका छन् । आर्सनलमा इमाइल स्थि रोवे र बुकायो साका जस्ता युवा खेलाडीहरुले पाएको मौका सदुपयोग गरिरहँदा पेपे भने छायाँमा परिरहेका छन् । हालै रियल म्याड्रिडबाट आइपुगेका युवा प्लेमेकर मार्टिन ओडेगार्डलाई पनि मौका दिनुपर्ने हुँदा पेपे आर्सनलमा थप किनारामा पर्ने निश्चित छ ।