२४ घण्टामा कोभिड-१९ बाट संक्रमित हुने भन्दा डिस्चार्ज हुने धेरै

काठमाडौं : पछिल्लो २४ घण्टामा देशभर कोभिड-१९ बाट संक्रमित हुने भन्दा संक्रमणलाई जितेर डिस्चार्ज हुने धेरै देखिएका छन् । स्वास्थ्य तथा जनसंख्या मन्त्रालयको नियमित प्रेस व्रिफिङमा प्रवक्ता प्राडा जागेश्वर गौतमले दिएको जानकारीमा संक्रमित हुने भन्दा संक्रमण जितेर डिस्चार्ज हुनेको संख्या धेरै देखिन्छ ।

गौतमले दिएको जानकारी अनुसार २४ घण्टामा संक्रमण जितेर घर फर्किनेहरुको संख्या २ हजार ९ सय ८१ जना छन् भने १ हजार ९ सय ५४ नयाँ संक्रमित थपिएका छन् । 

त्यस्तै बुधबार कोभिड १९ को कारण ११ जनाको मृत्यु भएको प्रवक्ता गौतमले जानकारी दिए । बुधबारसम्म ८८७ जनाको कोभिड १९ को कारण मृत्यु भइसकेको छ ।
 
२४ घण्टामा प्रदेश १ मा ५७२, प्रदेश २ मा ६२, वाग्मती प्रदेशमा १ हजार १७८ जना, गण्डकी प्रदेशमा ११५, प्रदेश ५ मा १२, कर्णाली प्रदेशमा ७ र सुदूरपश्चिममा ८ जना संक्रमित थपिएका छन् ।

काठमाडौं उपत्यकामा २४ घण्टामा जम्मा ८ सय ४३ जना संक्रमित थपिएका छन् भने ती मध्ये ३ सय ६८ महिला छन् र पुरुष ४ सय ७५ छन् ।