५० प्रतिशत काम घरबाटै, कोभिडबाट मृत्यु हुनेको संख्या सात लाख पुग्‍न सक्ने अनुमान

काठमाडौँ : जो बाइडन नेतृत्व अमेरिकी प्रशासनले अमेरिकामा कोभिड-१९ काे संक्रमणकाे कारण सातलाख नागरिकको ज्यान जानसक्ने आंकलन गरेको छ । यससँगै सचेतना अपनाउन सन्देश दिने काम भएको छ । अहिले राष्ट्रपतिको हरेक कार्यक्रममा सामाजिक दुरीलाई विशेष ध्यान दिएको र अन्य क्षेत्रमा पनि यसलाई प्रोत्साहन गर्न भनिएको छ । यतिसम्म कि उपराष्ट्रपति कमला ह्यारिसलाई पनि राष्ट्रपतिसँग भेट गर्दा सामाजिक दुरी अपनाउन अनुरोध गरिएको छ ।

अमेरिकामा कोभिड-१९ बाट कूल दुई करोड ५६ लाख भन्द बढी मानिस प्रभावित भइसकेका छन् । चार लाख २९ हजार मानिसको त मृत्यु नै भएको छ । बाइडन प्रशासनको अनुमान अनुसार कोभिड-१९ संक्रमणबाट अमेरिकामा ७ लाख मानिसको ज्यान जान सक्नेछ । त्यसैले यसमा सचेतना अपनाइउन ह्वाइट हाउसको नयाँ प्रशासन सक्रिय रहेको हो । अमेरिकी तथ्यांकअनुसार हालसम्म कोरोनाबाट मर्ने अमेरिकीमा ९५ प्रतिशत मानिसको उमेर ५० वर्षमाथि छ ।

राष्ट्रपति बाइडन आफैँ अमेरिकाका पाका उमेरका नागरिक हुन् । उनको उमेर ७८ वर्ष भइसकेको छ । उनी जस्तै पाका अमेरिकीलाई संक्रमणबाट उनलाई बचाउन सबैभन्दा ठूलो चुनौती अहिलेसम्मकै पाका व्यक्तिको नेतृत्वमा रहेको अमेरिकी प्रशासनलाई थपिएको छ ।

ह्वाइट हाउसले यतिबेला आफ्नो काम गर्ने शैलीमा नै परिवर्तन गरेको छ । उसले ५० प्रतिशत कर्मचारीलाई घरबाटै काम गर्न प्रोत्साहन गरेको छ । ह्वाइट हाउसमा महत्वपूर्ण व्यक्तिको सानो समूहलाई मात्र काममा बोलाएको पनि जानकारी अन्तराष्ट्रिय सञ्‍चार माध्यमहरुले जनाएका छन् । कोभिड-१९ सँग जोडिएको सरकारी ‘गाइडलाइन’ पालना गर्न पनि भनिएको छ । अनिवार्य मास्क लगाउने, सेनिटाइजरको प्रयोग गर्ने र सबै स्थानमा भौतिक दुरी कायम गर्न ह्वाइटहाउसले उर्दी नै जारी गरेको छ ।

‘कार्यालयमा आउने हरेक कर्मचारीले दैनिक कोभिड–१९ परीक्षण गर्नुपर्ने छ,’ ह्वाइट हाउसले नियमित अन्तरक्रियामा जानकारी दिएकोहो । यसअघि तीन पटक ह्वाइट हाउसमा कोभिडको संक्रमण फैलिएकाले पनि त्यसमा सचेतना अपनाइएको जानकारी दिइएको छ । यद्यपि राष्ट्रपति बाइडनले कोभिड-१९ विरुद्धको खोपको पहिलो डोज लिइसकेका छन् । यतिबेला ह्वाइटहाउस उनको स्वास्थ्यलाई लिएर अति नै संवेदनशिल बनेको र जोखिमबाट टाढा राख्‍ने प्रयास गरेको छ ।