आर्सनलले हालै भित्र्याएको ओडेगार्डबारेमा पाँच तथ्य

काठमाडौँ : आर्सनलले हालै रियल म्याड्रिडबाट मार्टिन ओडेगार्डलाई ‘लोन’ मा अनुबन्ध गरेको छ । ६ वर्षअघि स्पेनी राजधानी गएका २२ वर्षीय ओडेगार्ड गत सिजन ला लिगाकै रियल सोसडाडामा थिए । म्याड्रिडबाट लन्डन आइपुगेका नर्वेजियन मिडफिल्डर आर्सनलमा जारी सिजनको अन्त्यसम्म रहनेछन् । यस आलेखमा उनै ओडेगार्डका पाँच तथ्यका बारेमा चर्चा गरिनेछ ।

१५ वर्षमा डेब्यु 
सन् १९९८ को डिसेम्बरमा जन्मेका ओडेगार्ड नर्वेको राष्ट्रिय टोलीका लागि डेब्यु गर्दा १५ वर्ष दुई सय ५३ दिनको थिए । सबैभन्दा सानो उमेरमा नर्वेका लागि डेब्यु गर्ने कीर्तिमान राखेका ओडेगार्डले राष्ट्रिय टिमका लागि २५ खेल खेलिसकेका छन् । सन् २०१९ मा युरो कप छनौट अन्तर्गत रोमानियाका विरुद्ध पहिलो गोल गरेका ओडेगार्ड अहिले पनि विशव फुटबलमा उत्कृष्ट युवा प्लेमेकर मध्येका एक मानिन्‍छन् । 

बुवा-छोरा एउटै टिममा
ओडेगार्ड जुनियर सन् २०१५ मा रियल पुग्दा उनका बुवा हान्स एरिक ओडेगार्ड पनि उही क्लब पुगे । प्रशिक्षकका रुपमा । नर्वेको घरेलु लिग खेलेको अनुभव बोकेका हान्स रियलको युवा टोली हर्ने प्रशिक्षकमा नियुक्त भए । त्यसैबेला रियलका वर्तमान प्रशिक्षक जिनेदिन जिदान भने रिजर्भ टिमका जिम्मेवारी सम्हालिरहेका थिए । स्पेनी सञ्चार माध्यमका अनुसार ४७ वर्षिय हान्स जिदानको भन्दा बढी तलब बुझ्थे । हाल उनी नर्वेमा पहिलो श्रेणीको सान्डेफोर्डको मुख्य प्रशिक्षक छन् । 

रियलको इतिहासमै कान्‍छो खेलाडी 
१६ औ जन्मदिन अघि नै रियलसँग अनुबन्धित भएका ओडेगार्डले स्पेनी क्लबको सिनियर टिमका लागि मे २०१५ मै डेब्यु गरे । गेटाफेसँगको खेलको दोस्रो हाफमा उनलाई क्रिस्टियानो रोनाल्डोको ठाउँमा मैदान प्रवेश गराइएको थियो । कार्लो एनसिलोट्टीको नेतृत्वमा रहेको रियलका लागि ओडेगार्डले १६ वर्ष एक सय ५७ औ दिनमा डेब्यु गरेका थिए । जुन रियलको इतिहासमै सबैभन्दा साने उमेरमा गरिएको डेब्यु थियो । ओडेगार्डको सो कीर्तिमान अहिले सम्म तोडिएको छैन ।

लियोनल मेस्सी सर्मथक  
रियलका खेलाडी भएपनि ओडेगार्ड लियोनल मेस्सीका सर्मथक हुन् । जुन उनले सार्वजानिक रुपमा ब्यक्त गरिसकेका छैनन् । ओडेगार्डका पूर्व प्रशिक्षक हाराल्ड जोहानेसेनका अनुसार आर्सनलका नयाँ खेलाडी नर्वेमा रहँदा मेस्सीका ‘फ्यान’ का रपमा परिचित थिए । ‘उनी मेस्सीको सर्मथक हुन् । तर त्यस बाबजुद पनि उनी रियल जादैछन् । जुन आफैमा अच्चम्मलाग्दो छ ।’ जोहानेसेनले सन् २०१९ मा ‘दिज फुटबल टाइम्स’सँगको अन्तवार्तामा भनेका थिए ।

सधैं ‘लोन’ मा  
ओडेगार्ड बेर्नाबाउ जानुअघि सबैजसो ठूलो क्लबको नजरमा थिए । त्यसका बाबजुद उनले रियल नै रोजे । तर उनी १३ पटकको स्पेनी च्यामिपयनका लागि पहिलो एघारमा पर्ने खेलाडी बनिसकेका छैनन् । जसका कारण उनी लोनमा विभिन्न क्लब जान बाध्य भए । आर्सनल तर्फको सरुवा उनी रियल आइसकेपछिको चौथौं सरुवा हो । यसअघि सोसिडाड र हल्यान्डका हिरेनभिन र भिटेजमा केही वर्ष बिताएका ओडेगार्डका लागि आर्सनल तर्फको सरुवा ठूलो मौका हो । गत सिजन सोसिडाडका लागि ३१ लिग खेल्दा नौ गोल र असिस्ट दर्ता गरेका ओडेगार्डले मिकेल आर्टेटाको टिममा गोलको अवसर सिर्जना गर्ने अपेक्षा गरिएको छ । (अन्तराष्ट्रिय सञ्चार माध्यमको सहयोगमा)