नेकपा फुटेको छैन, चाहेर पनि फुट्दैन : ईश्वर पोखरेल

काठमाडौं :  नेकपा ओली समूहका नेता तथा उपप्रधानमन्त्री ईश्वर पोखरेलले नेकपा नफुटेको र कसैले चाहेर पनि नफुट्ने दाबी गरेका छन् । नेकपा ओली समूह र दाहाल–नेपाल समूहमा विभाजन भएर फरक पार्टीको अभ्यास नै सुरु भएसकेको अवस्थामा पोखरेलले यस्तो बताएका हुन् । त्यस्तै नेकपाको दुबै समूह एक अर्काको विरुद्धमा आन्दोलनमा उत्रिरहेका छन् । 

निर्वाचन आयोगमा आफू पक्ष नै आधिकारीक नेकपा भएको दाबी गरेर पत्र बुझाए पनि दुबै पक्षलाई आयोगले त्यसलाई मान्यता दिएन । पोखरेलले आयोगको निर्णयलाई सकरात्मक ढंगबाट लिएको बताएका छन् । ‘आयोगको निर्णयलाई सम्मान र सकारात्मक ढंगले लिएका छौँ । ओलीले राखेको अडानलाई आयोगको निर्णयले बल पुग्ने देखेका छौँ,’ उनले भने, ‘हामी फुटको पक्षमा छैनौं। नेकपा फुटेको छैन र चाहेर पनि फुट्दैन।’