मिम बनेका बर्नी सान्डर्स

काठमाडौँ : नव निर्वाचित अमेरिकी राष्ट्रपति जो बाइडनको त्यो शपथ ग्रहण कार्यक्रम । कार्यक्रममा बोलाइएका अधिक अतिथि मध्येका एक, बर्नी सान्डर्स । जो भिडमा पनि एक्लै बसिरहेका थिए । त्यो पनि अनौपचारिक पोशाकमा । ‘विन्टर ज्याकेट’ लगाएर कुर्सीमा बसिरहेका सान्डर्सको तस्बिर यो साता भाइरल बन्यो ।  

त्यसो त भेरमोन्टका सिनेटरको त्यो तस्बिर अत्याधिक मन पराइयो । अनि ‘मिम’ पनि बन्यो । कोभिड-१९ कालमा भौतिक दूरी कायम गरी बसिरहेका सान्डर्सको तस्बिर फ्रेन्च समाचार एजेन्सीका फोटो पत्रकार ब्रेन्डन सिमयालोस्कीले खिचेका थिए । हलिउड स्टार टम ह्याङ्क्सको छेउमै बसिरहेका सान्डर्सलाई 'मिम' बनाउनेहरूले टेयर स्विफ्ट, ओएसिस लगायतका हलिउड गायक/समूहको गिती संग्रहको कभरमा राख्‍नेसम्मको काम गरे । 

‘भेरमोन्टमा हामी फेसनको मतलब गर्ने भन्दा पनि जुन पोशाकले न्यानो बनाउँछ त्यही लगाउँछौ । हाम्रो लागि न्यानो रहनु नै महत्वपूर्ण हो । आज मैले मेरा लागि जे महत्वपूर्ण हो त्यही गरे,’ सान्डर्सले आफूले लगाएको ज्याकेटका बारेमा गरिएका टिप्पणीतर्फ इङि्गत गर्दै अमेरिकी टेलिभिजन च्यानल सीबीएस न्यूजसँग भने । उता सान्डर्सकी पत्‍नीले आफ्नो श्रीमानको पोशाकको तारिफ गरिन् । ‘भेरमोन्टको ज्याकेट, भेरमोन्टकै पञ्‍जा, भेरमोन्ट ‘कमन सेन्स’’ उनले ट्‍वीट गरेकी छन् । 

सान्डर्स अमेरिकी राजनीतिको पुरानो नाम हो । डेमोक्रयाट्का तर्फबाट सन् २०२० को अमेरिकी राष्ट्रपतीय निर्वाचनमा भाग लिन चाहेका सान्डर्स अझै पनि लोकप्रिय छन् । अहिलेको अमेरिकी राजनीतिबाट असान्दर्भिक भइनसकेका सान्डर्सलाई ट्‍वीटर प्रयोगकर्ताहरूले उनलाई दोस्रो विश्‍वयुद्ध ताकाको याल्टा सम्मेलनसँग पनि जोड्न भ्याए । सन् १९४५ मा भएको सो सम्मलेनमा भाग लिइरहेका बेलायती प्रधानमन्त्री विन्सटन चर्चिल, अमेरिकी राष्ट्रपति फ्रांन्कलिन रुजबेल्ट र सोभियत संघका नेता जोसेफ स्टालिनसँग एउटै तस्बिरमा समेत सान्डर्सलाई राखियो । 

श्यामस्वेत तस्बिरमा बसिरहेका त्यसबखतका विश्‍वलाई नेतृत्व गरिरहेका नेताहरूका माँझ मात्रै सान्डर्सलाई पुर्‍याइएन । उनलाई जिजस क्राइस्टसँग पनि भेटाउने काम भयाे, तस्‍बिरमा । अर्को एउटा 'मिम'मा त सान्डर्सलाई चन्द्रमामा पुगेको समेत देखाइयो । जसले अन्तरिक्षक यात्रीले लगाउने हेलमेट लगाएर अमेरिकी झण्डा बोकेर  त्यहाँ उभिएका थिए। 

सान्डर्सले लगाएको पोशाक भरमोन्टकै एक शिक्षकले प्लास्टिक बोतललाई रिसाइकल गरी तयार पारेको कच्चा पर्दाथबाट बनेको बताइएको छ । एउटा ठूलो खाम बाकेर क्यापिटोल हिल आइपुगेका सान्डर्सलाई हुलाक गइरहँदा बीचबाटोमा शपथ कार्यक्रम हेर्नका लागि रोकिएका एक अमेरिकी वृद्धसँग पनि तुलाना गरियो । सान्डर्स डाक्टर भेट्न गइरहेका वृद्धा जस्तो पनि देखिन्थे । (अन्तराष्ट्रिय सञ्‍चार माध्‍यमहरूकाे सहयोगमा)