प्रधानमन्त्री कपमा एपीएफको तेस्रो जित

काठमाडौँ : प्रधानमन्त्री कप राष्ट्रिय पुरुष त्रिकेट प्रतियोगितामा शसस्त्र प्रहरीको एपीएफ क्लबले आफ्नो रवाफिलो प्रदर्शनलाई जारी राखेको छ । प्रतियोगितामा अपराजित एपीएफले शनिबार कर्णाली प्रदेशलाई ७१ रनले पराजित गरेको छ । 

जित दर्ता गरेसँगै एपीएफले समूह ए मा पहिलो स्थान कब्जा गरेको छ । तीन खेलबाट ६ अंक नै बनाएको अर्को विभागीय टोली त्रिभुवन आर्मी क्लब भने रनरेटका आधारमा दोस्रो स्थानमा छ । पराजित कर्णली भने चार खेलबाट दुई अंक सहित चौंथौं स्थानमा छ ।
 
कीर्तिपुरस्थित त्रिभुवन विश्‍वविद्यालय क्रिकेट मैदानमा सम्पन्‍न खेलमा एपीएफले टस जित्दै ब्याटिङ गर्दा ४९.५ ओभरमा सम्पूर्ण विकेट गुमाएर दुई सय १८ रन बनायो । जवाफी ब्याटिङमा उत्रेको कर्णाली ४३.२ ओभरमा एक सय ४७ रनमा सिमित भयो । 

एपीएफलाई विजय बनाउन सन्दिप जोराको अर्धशतक महत्वपूर्ण रह्यो । उनले ७६ बलको समाना गर्दै ६० रन बनाए । जोराले छैठौं विकेटका लागि अमर रौतेलासँग ७८ रनको साझेदारी गरे । मध्यक्रमका रौतेलाले ३१ रनको योगदान गरे । 

त्यसअघि एपीएफका ओपनरहरूले सन्तोषजनक सुरुवात दिलाउन सकेनन् । एपीएफको इनिङ सुरुवात गर्न गएका रित गौतम शुन्यमा आउट हुँदा अर्का ओपनर सवास खकुरेलले २३ रनको योगदान गरे । शंकर राना र बसन्त रेग्मीले क्रमशः १५ र १४ जोड्दा अन्य उल्लेख्य स्कोर गर्न सकेनन् ।
 
कर्णलीका अनुज चुनारा र रविन्द्र शाहीले तीन-तीन विकेट लिए पनि एपीएफलाई सस्तैमा समेट्न सकेनन् । कर्णलीका लागि दिवन पुन र राज शाहीले दुई-दुई विकेटको योगदान गरे ।
 
उता कर्णलीका हेमन्त ओलीले अर्धशतक प्रहार गरे पनि कर्णली प्रतियोगिताको तेस्रो पराजयबाट बच्‍न सकेन ।  ओेलीले एक सय दुई बलको सामना गर्दा छ चौकाको सहयोगमा ५८ रन बनाए । कर्णलीका लागि हिमांशु शाहीले २० रनको योगदान गर्दा कप्तान रविन्द्र शाहीले १४ रन प्रहार गरे । त्यस्तै, अभिषेक ठकुरी र राज शाहीले समान १४ रन बनाए ।
 
कर्णालीलाई लक्ष्य प्राप्तीबाट रोक्न बसन्त रेग्मी र किशोर महतोले तीन-तीन विकेट लिए । त्यस्तै भुवन कार्कीले दुई विकेट दर्ता गर्दा कप्तान शरद भेष्वाकरले एक विकेट थपे ।