ओलीको प्रतिगामी कदमले नेकपा पुनर्गठन गर्नु पर्ने अवस्था आयो : पौडेल

काठमाडौँ : नेकपा (दाहाल-नेपाल समूह)का स्थायी समिति सदस्य देवेन्द्र पौडेलले प्रधानमन्त्रीसमेत रहेका पार्टी अध्यक्ष केपी शर्मा ओलीको प्रतिगामी कदमले नेकपा पुनर्गठन गर्नु पर्ने अवस्थामा पुर्‍याएको बताएका छन् । शनिबार काठमाडौंमा मार्क्सवादी ज्ञान केन्द्रले आयोजना गरेको अन्तरक्रिया तथा कम्युनिष्ट स्कुल लोकार्पण कार्यक्रममा पार्टी एकताका क्रममा भएका कमिकमजोरीहरूलाई सच्याए नेकपालाई नयाँ जीवन दिइने पौडेलले बताए । 

जनताको माग एकता तिर रहेको र जनतासँग गरेको बाचा र व्यवहारमा तादम्यता मिलाउन नसकिएको भन्दै उनले समाजवादी क्रान्तिलाई नयाँ ढंगबाट अगाडि बढाउनुपर्ने बताए । कम्युनिस्ट आन्दोलनलाई नयाँ उचाइमा पुर्‍याउन नयाँ पुस्तामा पार्टी नेतृत्व हस्तान्तरण हुनुपर्ने र नयाँ पुस्ताले पनि त्यसको लागि अब संघर्ष गर्नुपर्ने बेला आएको उनले बताए । 

कार्यक्रममा नेकपा स्थायी समिति सदस्य योगेश भट्टराईले नयाँ पार्टी निर्माणको प्रक्रियामा अघि बढेको र प्रतिनिधि सभा विघटन नयाँ संस्कृति निर्माणको बहस भएको बताए । प्रतिनिधि सभा पुनर्स्थापनाको विषयलाई पुष्पकमल दाहाल र माधवकुमार नेपालको मुद्दाका रूपमा बुझे देशमाथि खतरा आउने उनको भनाइ छ ।

नेता भट्टराईले केपी ओली समूह अराजतीतिक समूह भएको भन्दै पार्टीको नाममा ओली समूहले राज्यलाई लुटिरहेको बताए ।