संसद पुन: स्‍थापनाका लागि संयुक्त आन्दोलन गरौं : केसी

बुटवल : राष्ट्रिय जनमोर्चाका अध्यक्ष चित्रबहादुर केसीले प्रधानमन्त्री ओलीको प्रतिगामी कदमबिरुद्व संयुक्त आन्दोलन आवश्यक रहेको बताएका छन् । 
विघटित प्रतिनिधि सभा पुनः जीवित गर्न सकिने भन्दै त्यसका लागि आन्दोलनका मोर्चा बनाउनु पर्ने उनले बताए ।

प्रतिनिधि सभाको विपक्षमा रहेका सबै राजनीतिक दल र नागरिक समाजको संयुक्त आन्दोलन आवश्यक रहेको उनको भनाइ छ । विगतमा राजा र पञ्चायतविरुद्धका अन्दोलनहरूमा नेपाली कांग्रेस, कम्यूनिष्ट पार्टीहरू र मधेशकेन्द्रित दल एक भएर संघर्षमा गएजस्तै यस पटक पनि त्यस्तो आन्दोलन आवश्यक रहेको उनको भनाइ छ ।

राष्ट्रिय जनमोर्चाले बिहीबार बुटवलमा आयोजना गरेको प्रतिनिधिसभाको विघटन र संयुक्त आन्दोलनको प्रश्न’ विषयक अन्तरक्रियामा उनले यस्तो बताएका हुन् । अध्यक्ष केसीले भने, ‘संसद विघटनगरी चालेको असंवैधानिक, प्रतिगामी  कदम उल्टाउन नसकिए देशमा संकट आउन सक्छ, त्यसका लागि आन्दोलन अपरिहार्य छ ।

उनले सरकारले घोषणा गरेको आगामी वैशाख १७ र २७ मा मध्यावधि निर्वाचन हुनेमा पनि शंका व्यक्त गरे । नेपालमा अस्थिरता पैदा गरेर विदेशी शक्तिकेन्द्रहरु आफ्नो अनुकुलमा खेल्न थालेको केसीको ठहर छ । ‘प्रधानमन्त्री र राष्ट्रपतिको कदमले संविधान, गणतन्त्र र प्राप्त उपलब्धिहरू गुम्ने अवस्थामा पुगेको छ, यसको चिन्ता हिजोका परिवर्तनकारी शक्तिले गर्नु पर्छ ।’ 

गणतन्त्रविरुद्ध राजावादी, विदेशी हिन्दु अभिवादी तथा वामपन्थी संकीर्णवादीगरी तिन तर्फबाट आक्रमण भइरहेको केसीको दाबी छ ।