पोखराका तीन शिक्षक पक्राउ

काठमाडौं : होटलमा परीक्षा सञ्चालन गरिरहेका कास्कीका तीन शिक्षकलाई प्रहरीले पक्राउ गरेको छ । विद्यार्थीलाई परीक्षा केन्द्र भन्दा बाहिर होटलमा लगेर परीक्षा लिएपछि पोखरा महानगरपालिका–१ पुरानो टुँडिखेलस्थित राष्ट्रिय माध्यामिक विद्यालयका ३ जना शिक्षकलाई सोमबार बेलुका पक्राउ गरिएको कास्की प्रहरीले जनाएको छ । 

पक्राउ पर्नेमा विद्यालयका प्रधानाध्यापक सूर्य तिवारी, घनश्याम रेग्मी, शिरिषकुमार बस्ताकोटी रहेका छन् ।  पक्राउ परेका शिक्षकहरुले कक्षा ११ को ऐच्छिक अंग्रेजी र शैक्षणिक विधि विषयक आंशिक परीक्षामा सोही विद्यालयकी एक छात्रालाई परीक्षा केन्द्र भन्दा बाहिर होटलमा लगेर अमर्यादित रुपमा परीक्षा लिएपछि पहरीले पक्राउ गरेको हो । 

उनीहरुलाई राष्ट्रिय परीक्षा बोर्ड सानोठिमी, भक्तपुरको जाहेरीको आधारमा पक्राउ गरेको हो । उनीहरुमाथि शिक्षा ऐन अन्तर्गत मुद्दामा जिल्ला अदालत कास्कीबाट ५ दिन म्याद थप गरेर अनुसन्धान प्रक्रिया अगाडि बढाइएको कास्की प्रहरीले जनाएको छ ।