बेन एफलेक र एनाको ब्रेकअप !

लसएन्जल्स : हलिउडमा महामारीले कति घर जोडिए त कति भत्किए । महामारीकै बीचमा कतिले विवाह गरे त कतिले बच्चा जन्माए । अझ कतिले त यही बीचमा बच्चा हुर्काइ पनि सकेका छन् । तर, अभिनेता बेन एफलेक र अभिनेत्री एना डि आरमसको भने महामारीकै समयमा ब्रेकअप भएको खबर छ । 

एक वर्ष अघि बेन र एनाको अफेयरको खबर हलिउडका लागि कम आश्चर्यजनक खबर थिएन । १६ वर्ष जेठाकान्छा उनीहरू अफेयरमा परेको खबरले गसिप बजारमा राम्रै भाउ पाएको थियो । एनाले इन्स्टाग्राम स्टोरीमा बेनसँगको फोटो राख्दै अफेयरको खबरलाई पुष्टि गरेकी थिइन् । त्यसयता दुवै अनगिन्ती ठाउँमा सँगै जाने गरेका थिए । 

क्वारेन्टाइन पिरियडभरी लसएन्जल्स बसेको जोडी पछिल्लो समय भने बेग्लाबेग्लै बस्न थालेको र दुवैले फोनबाटै एक अर्कालाई ‘गुडबाई’ गरेको समाचार छन् । दुवैले सहमतिमा एकअर्काको बाटो लाग्ने गरेको निर्णय गरेको पनि हल्ला छ । तर, निकट स्रोतलाई उद्धृत गर्दै लेखिएका समाचारमा बेनको लसएन्जल्स छाड्न नचाहे पनि यही कुरा नै ठूलो भएर ब्रेकअपसम्म पुगेको उल्लेख गरिएको छ ।

बेनको पूर्व पत्नी जेनिफर गार्नरबाट तीन सन्तान छन् र तीनैजना लसएन्जल्समै बस्छन् ।  बेन र एना सन् २०१९ मा खिचिएको ‘डीप वाटर’को सेटमा भेटिएका थिए । त्यही भेट बिस्तारै प्रेममा परिणत भएको थियो । त्यसयता एनाले जेम्स वन्ड सिरिजको ‘नो टाइम टु डाई’ र ‘ग्रे मेन’मा अभिनय गरेकी छिन् भने बेन ज्याक स्नाइडरको ‘दि लास्ट लिग’मा देखिँदैछन् ।