महानगरले थाल्यो रानीपोखरीको सरसफाइ

काठमाडौं : रानीपोखरीको पानीमा जम्न थालेको हरियो लेउ र झ्याउ काठमाडौं महानगरपालिकाले हटाउन थालेको छ । पोखरीको सौन्दर्यलाई कायम राख्न काठमाडौँ महानगरपालिकाले मंगलबारदेखि पोखरीको सरसफाइ थालेको हो । यसका लागि नगर प्रहरीको टोली खटाइएको छ ।   

पुननिर्माणपछि चिटिक्क भएको पोखरीको पानीमा लेउ पर्न र झ्याउ पलाएपछि कुरुप बन्न थालेको थियो । महानगरपालिकाका प्रमुख प्रशासकीय अधिकृत राजेश्वर ज्ञवालीका अनुसार राजधानीको केन्द्रमा रहेको पोखरी शुद्धीकरणको दीर्घकालीन समाधानका लागि महानगरले सरोकारवाला निकायहरुसँग छलफल गरिरहेको छ । उनी भन्छन्, ‘पुननिर्माणपछि रानीपोखरी महानगरलाई हस्तान्तरण भइसकेको अवस्था छैन । यद्यपि, पोखरी हाम्रै क्षेत्राधिकार भित्र पर्ने भएकाले हामीले शुद्धीकरणको प्रयास गरेका हौँ ।’ 

पोखरीको पर्यावरणीय व्यवस्थापनका लागि काठमाडौं महानगरले नियमित काम गर्ने ज्ञवालीले दाबी गरे । साथै पानीमा माछा नहालेकाले पनि छिट्टै लेउ र झ्याउले ढाकेको हुन सक्ने उनले अनुमान लगाए । यसको सन्तुलनका लागि पोखरी सफा गरेर पहिलो चरणमा केही माछा हालेर परीक्षण गर्ने र त्यसपछि दीर्घकालीन समस्या समाधानको बाटो अपनाउने तयारीमा रहेको उनले जनाए । 

नगर प्रहरी नायव उपरीक्षक धनपति सापकोटाकाअनुसार पोखरीको सफाइका लागि दैनिक २० जना नगर प्रहरी खटाइएको छ । दुई दिन ५० जना जनशक्तिले काम गर्दा करीब ८ ट्रिपर लेउ र झ्याउ झिकिएको छ । लेउ न्युनीकरण गर्ने औषधि र पानीको मात्रा बढाउने उपायका बारेमा प्राधिकरणसँग कुरा भइरहेको उनको भनाइ छ ।

यस अघि महानगरपालिकाकै सहकार्यमा रानीपोखरीमा पानी भर्ने काम भएको थियो । प्राधिकरणका इन्जिनियर राजुमान मानन्धरका अनुसार अहिले रानीपोखरीको पानीको सतह घटेको छ । उनी भन्छन्, ‘हामीले सुरुमा ५ फिट २ इन्चमा करीब ३ करोड २२ लाख लिटर पानी भरिएको थियो । अहिले सतह घटेर त्यहाँ करीब ३ फिट जति अर्थात् करीब २ करोड लिटर हाराहारीमा मात्रै पानी रहेको अनुमान गरेका छौँ ।’