ओलीको सनकले विदेशी चलखेल बढ्यो : केसी

फाइल तस्वीर

बुटवल : राष्ट्रिय जनमोर्चाका अध्यक्ष चित्रबहादुर केसीले संसद विघटनसंगै नेपालमा विदेशी शक्ति केन्द्रहरूको चलखेख बढेको बताएका छन् । भारत, अमेरिका, चीन र युरोपियन युनियनको चलखेल बढेको उनको दाबी छ । संसद विघटन देश र जनताको हितविपरीत रहेको उल्लेख गर्दै केसीले प्रतिनिधि सभा विघटन विदेशी शक्ति केन्द्रहरूको इसारामा भएको पनि आरोप लगाए । 

राष्ट्रिय जनमोर्चा रुपन्देहीले बुटवलमा आयोजना गरेको अगुवा कार्यकर्ता भेलामा बोल्दै अध्यक्ष केसीले सत्तासिन दलका नेताहरूको स्वार्थका कारण संसद विघटन भएको बताए । केपी शर्मा ओली र पुष्पकमल दाहालको स्वार्थ पुरा नहुँदा देश दुर्घटनातर्फ उन्मुख भएको उनको भनाइ छ । 

नेकपाको विभाजन जनताका लागि नभई सत्ता, शक्ति, स्वार्थ नमिलेका कारण भएको केसीको ठहर छ । उनले भने, ‘सिद्धान्त, नीति र विचारका आधारमा एकता नभएकाले छोटो समयमा नै नेकपामा विवाद आएको हो ।' उनले सर्वोच्च अदालतसमेत निष्पक्ष हुन नसक्नु दुखद पक्ष भएको भन्दै संवैधानिक इजलास गठन गर्नु नै नीतिगत कमजोरी भएको बताए ।