६ पृष्ठ लामो दाहाल-नेपालको अपिलमा के छ ?

फाइल तस्बिर

काठमाडौं : नेकपाका अध्यक्षद्धय पुष्पकमल दाहाल र माधवकुमार नेपालले देश र संविधान जोगाउन आन्दोलनमा उत्रिन नेता कार्यकर्तालाई अपील गरेका छन् ।

नेता कार्यकर्तालाई सम्बोधन गर्दै जारी गरिएको ६ पृष्ठ लामो अपीलमा दाहाल-नेपालले प्रधानमन्त्री केपी शर्मा ओलीले प्रतिनिधि सभा विघटन गर्दा व्यवस्था मासिने जोखिम रहेको भन्दै त्यसलाई जोगाउन आन्दोलनमा उत्रिन आह्वान गरेका हुन् ।

‘अहिले दुर्घटनामा परेर अस्पतालको ओछ्यानमा अचेत भएर लडिरहेको घाइतेको जस्तो अवस्थामा संविधान पुगेको छ’ दाहाल-नेपालद्धारा जारी अपीलपत्रमा भनिएको छ, ‘संविधानको कार्यान्वयन र रक्षा गर्नुपर्ने प्रधानमन्त्री र राष्ट्रपतिले आफ्नो दायित्व बिर्सेर गरेको षडयन्त्रमुलक प्रहारले संविधान घाइते भएको छ । घाइते भएको संविधानलाई सहज ढंगबाट पुनः स्वस्थ्य र सुचारु पार्ने अभिभारा यतिबेला सर्वोच्च अदालतको काँधमा आइपरेको छ ।’

चार वटा बुँदामा अपील पत्र जारी गरेका दाहाल-नेपालले ओलीको प्रतिगमनविरुद्ध एक हुन सबैलाई आह्वान गरेका छन् । यस्तै दोस्रो बुँदामा प्रधानमन्त्री ओलीले फैलाएका भ्रमबारे स्पष्ट हुन पनि दाहाल नेपालले आग्रह गरेका छन् । 

आफूलाई काम गर्न नदिएको, घेराबन्दी गरेको भन्दै प्रतिनिधिसभा विघटन गरेको दाबी गर्ने ओलीले प्रतिनिधिसभामा विश्वासको मत लिन छाडेर व्यवस्थाकै घाटी निमोठ्नु गलत रहेको  दाहाल-नेपालको भनाई छ । प्रधानमन्त्री ओलीले प्रतिनिधि सभा विघटन गरेर संविधान, संघीयता र गणतन्त्र सिध्याउन लागेको दाहाल नेपालको आरोप छ ।

देश जोगाउनका लागि सबैले ओलीको प्रतिगमनविरुध्‍द आवाज उठाउनुपर्ने भन्दै दाहाल-नेपालले आवश्यक परेको खण्डमा सडक आन्दोलनमा उत्रिनुपर्नेमा पनि जोड दिएका छन् । व्यवस्था जोगाए मात्रै देश जोगिने भन्दै उनीहरुले प्रजातान्त्रिक व्यवस्था नै मास्ने कदमविरुद्ध सबै एकजुट हुन आह्वान गरेका छन् ।

प्रधानमन्त्री केपी शर्मा ओलीले प्रतिनिधि सभा विघटन गरेको मुद्दा अहिले सर्वोच्च अदालतमा विचाराधीन छ । सर्वोच्चको संवैधानिक इजलासमा दैनिक सुनुवाइ भइरहेको मुध्दामा बहस गर्न साढे ३ सय वकिलले नाम टिपाएका छन् । 

सर्वोच्चमा चर्को बहस भइरहेका बेला विभाजमा पुगेको दाहाल नेपाल समूहको नेकपा, प्रमुख प्रतिपक्ष दल नेपाली कांग्रेस र नागरिक समाजले सडक आन्दोलन पनि गरिरहेका छन् ।