यो हो भूतपोखरी

दोलखा : नामै कालोपोखरी । गाउँहरुले यसलाई भूतपोखरी पनि भन्छन् । टाढाबाट हेर्दा पोखरीको पानी कालो देखिन्छ । मान्छेहरु पानी नै कालो हो कि भनेर झुकिन्छन् । तर, कालोपोखरीको पानी अंजुलीमा भर्दा कञ्चन लाग्छ । 

दोलखा जिल्लाको जिरी नगरपालिका–१ र रामेछापको गोकुलगंगा गाउँपालिका–१ को सीमा क्षेत्र जट्टापोखरी र पाँचपोखरीले चिनिन्छ । तर, कालोपोखरी न चिनिएको थियो, न यसलाई धेरैले देखेका थिए ।

 

जट्टापोखरी र पाँच पोखरी विशेष गरी जनै पूर्णिमाको दिनमा ठूलो मेला भर्नका लागि वार्षिक १० औं हजार तीर्थालुहरु पुग्छन् । तर, त्यसको पश्चिमपट्टि रहेको कालोपोखरीको बारेमा धेरैलाई जानकारी थिएन । 

गौरीशंकर गाउँपालिकाको पर्यटकीय गन्तव्यको खोजीका क्रममा कालोपोखरी अर्थात् भुतपोखरी फेला परेको हो । गौरीशंकर गाउँपालिकाको ६ हुलाकबाट जटापोखरी, पाँचपोखरी हिडेको गाउँपालिका अध्यक्ष सोयमबहादुर खड्काको नेतृत्वको टोलीले पोखरी फेला पारेको हो । धार्मिक तथा पर्यटकीय रुपमा यो पोखरी अत्यन्तै महत्वपूर्ण हुने अध्यक्ष खड्काले बताए ।