नेपाल–तिब्बत लडाईंको किल्ला दुगुनागढीमा ट्रेल रेस हुँदै

फाइल तस्विर

सिन्धुपाल्चोक– तिब्बतसँगको लडाईंमा तीन पटकसम्म किल्ला जमाएर नेपाली फौज बसेको ऐतिहासिक दुगुनागढीमा माउण्टेन ट्रेल रेस हुने भएको छ। सिन्धुपाल्चोकको भाेटेकोशी गाउँपालिका वडा न ३ स्थित सुख्खा बन्दरगाहदेखि लिस्तीकोट हुदै दुगुनागढीसम्म साढे २४ किलोमिटरको माउण्टेन ट्रेल रेस हुने भएको हो। आगामी फागुन २१ मा हुने माउण्टेन ट्रेल रेस यो दोस्रो संस्करण हो ।

नेपाली सेनाको गोरखबक्स गणकाे आयोजना र  भोटेकोशी गाउँपालिकाको प्रायाेजनमा दोस्रो लिस्तीकोट दुगुनागढी माउण्टेन ट्रेल रेस दौड प्रतियोगिता गरिन लागिएकाे हाे । प्रतियाेगितामा देशभरका खेलाडीहरु सहभागी हुने नेपाली सेना गोरखबक्स गण चौताराका गणपति प्रमुख सेनानी निर्मलकुमार श्रेष्ठले जानकारी दिए।

ऐतिहासिक क्षेत्रको संरक्षणमा जुटेको नेपाली सेनाले गत वर्षदेखि सिन्धुपाल्चोकको ऐतिहासिक लिस्तीमाई र दुगानागढीको प्रचारप्रसार एवम् संरक्षण गर्ने उद्धेश्यले ट्रेल रेसको आयोजना गदै आएको हो ।

नेपाल तिब्बतबीच पहिलो पटक सन् १७८८, दोस्रो पटक सन् १७९२ र तेस्रो पटक सन् १९८५ मा भएको युद्धको बेला भोटेकोशी गाउँपालिकाको लिस्तीमाइको दर्शन गरेर नेपाली फौजहरु लडाइमा गएको इतिहासमा उल्लेख छ ।

लिस्तीमाइको दर्शन गरेर दुगनागढीबाटै तिब्बतसँग लडाई लडेकाले दुगानगढीलाई ऐतिहासिक किल्लाको रुपमा लिने गरिएको छ । ऐतिहासिक एवम् सामरिक महत्वको क्षेत्र भएपनि त्यसको संरक्षण र उचित प्रचार प्रसार नभएको भन्दै नेपाली सेनाले यसअघि नै यस्ता ऐतिहासिक क्षेत्रको संरक्षणका लागि विविध कार्य गर्दै आएको छ ।

ऐतिहासिक महत्व बोकेको लिस्तीकोट र दुगानागढीलाई दौडको बाटोमार्फत वर्तमान र भावी पुस्तालाई इतिहासको जानकारी दिने उद्धेश्यले गत वर्षबाट प्रतियोगिता आयोजना गरिएको हाे । याे प्रतियाेगिताले यस ठाउँकाे महत्व बढाउने तथा पर्यटन प्रवर्द्धनमा सघाउ पुग्ने गाउँपालिका अध्यक्ष राजकुमार पाैडेलले बताए।

ट्रेल रेसमा खुला, महिला खुला र सिन्धुपाल्चोक जिल्लाबासी गरेर तीन विधा समावेश गरिएको छ । खुला तर्फ पहिलो हुनेले नगद १ लाख १० हजार,दोस्रो ७५ हजार, तेस्रो ५५ हजार, चौथो ४० हजार, पाँचौ ३० हजार र छैठौ पुरस्कार नगद २० हजार रुपैयाँ रहेको छ । त्यस्तै महिलातर्फ पहिलो हुनेले ६० हजार, दोस्रो ३५ हजार र तेस्रो हुनेले २० हजार रुपियाँ पाउँने छन् । जिल्लाबासीको लागि भने पहिलो हुनेले नगद ३० हजार,  दोस्रो २० र तेस्रो हुनेले १५ हजार पुरस्कार पाउने छन् ।

ट्रेल रेस प्रतियोगितामा सहभागी हुने खेलाडीहरुले फागुन १९ गतेसम्म दर्ता गरिसक्न सेनाले देशभरका खेलाडीहरुलाई अनुरोध गरेको छ । दर्ता निशुल्क हुने र सिन्धुपाल्चोकस्थित नेपाली सेनाको चौतारा ब्यारेक, जलेटार ब्यारेक, बाह्रबीसे, झिर्पु र लामोसाँघु ब्यारेकमा दर्ता गर्न सकिने सेनाले जनाएको छ । 

सम्भावित जोखिमलाई मध्य नजर गरी सिन्धुपाल्चोक उद्योग वाणिज्य संघले प्रतियोगिताको अवधिभरमा मात्र लागु हुने गरि रु पाँच लाख बराबरको विमाको व्यवस्था पनि गरेको छ।