रेखाको नयाँ फिल्म वैशाखदेखि फ्लोरमा

काठमाडौं : रेखा थापाले फिल्म बनाउने जमर्को गरेको दुई वर्ष भइसक्यो । पछिल्लो रिलिज ‘मालिका’पछि फिल्म बनाउन कस्सिएकी उनले यसबीचमा दुइटा फिल्म घोषणा गरिसकिन् । तर, उनले घोषणा गरेका दुवै फिल्म फ्लोरमा गएका छैनन् । जसमध्ये एउटा फिल्म रेनशा बान्तवा राईले निर्देशन गर्ने कुरा थियो भने अर्को सवीर श्रेष्ठले ।

रेनशा बान्तवा राईसँग त कागजी सम्झौता भएको फोटोसमेत बाहिरिएको थिए । तर, पछि यो फिल्म यत्तिकै थन्कियो । रेनशाले घरलु ब्यानरकै फिल्म ‘आइ एम ट्वान्टी वान’ सुरु गरिन् जसको ८० प्रतिशत सुटिङ सकिइसकेको छ । यता सवीरले गर्ने फिल्ममा भने बीचमा कलाकार फाइनल भएका समाचार आएका थिए । रेखा थापा मुख्य भूमिकामा रहनेगरी सौगात मल्ल र दयाहाङ राई फिल्ममा अनुबन्ध भएको खबर थियो ।

यहाँ पनि दुई मध्ये सौगातसँग कागजी सम्झौता भएको खबर थियो । तर, यो फिल्मको पनि काम अगाडि बढेको छैन । अब भने रेखाले वैशाखबाट फिल्म फ्लोरमा लैजाने तयारी गरिरहेको बताएकी छिन् ।  उनले कलाकार र बाँकी जानकारी उपयुक्त समयमा सार्वजनिक गर्ने बताएकी छिन् । ‘नयाँ कलाकारको दमदार इन्ट्री हुन्छ । त्योबाहेक रेखा आफैं पनि फरक अवतारमा देखिन्छे’ उनले भनिन् । रेखाले पछिल्लो समय शरीरको वजन घटाएकी छिन् । उनले फिल्मकै लागि वजन घटाएको पनि बताइन् ।