बुद्धले थप्यो ७२ सिटे जहाज, थप ३ थप्ने तयारी

काठमाडौँ - बुद्ध एयरले नयाँ जहाज थपेको छ । बुद्धले बुधबार एटीआर–७२ जहाज भित्र्याएको हो । 

कलसाइन नाइन एन-एएनपी रहेको जहाजको आवश्यक कागजी प्रक्रिया पुर्‍याई २ साताभित्र उडान सेवा दिने प्रेस विज्ञप्तिमार्फत जनाएको छ । ठूला जहाजबाट उडान भर्दा सञ्चालन खर्च कम हुने र हवाइभाडादर पनि स्वतः सस्तो र सहज हुने बुद्धले जनाएको छ । त्यसै अनुरुप बुद्ध एयरले ७२ सिटे जहाज भित्र्याएको हो । यससँगै बुद्ध एयरको जहाज संख्या १६ पुगेको छ । जसअनुसार ११ वटा एटीआर-७२, ३ वटा एटीआर-४२ र २ वटा बिचएयर क्राफ्ट जहाज रहेका छन् ।

बुद्ध एयर निरन्तर सहज र सरल भाडादरको लागि प्रतिवद्ध अनसुार अन्तरर्राष्ट्रिय यात्रुतर्फको ‘डलर’ हवाई भाडादर ८० प्रतिशतले घटाएको जनाएको छ ।

त्यस्तै नेपालमै ६ महिना अवधि बसाई गरेका अन्तर्राष्ट्रिय नागरिकहरुको हकमा यसअघि ७५ प्रतिशतले बढी रहेको भाडादर पनि घटाएको छ । सस्तिएको भाडादरले पर्यटक भित्र्याउन ठूलो मद्दत गर्ने बुद्ध एयरले विज्ञिप्ति मार्फत जनाएको छ । यसबाट पर्यटन क्षेत्रलाई पनि ठूलो टेवा पुग्ने बुद्ध एयरले जनाएको छ ।

 ‘बुद्ध एयर निरन्तर हवाईयात्रालाई सबैको पहुँच बनाएका छन् र यसलाई अझ सहज बनाउन प्रतिवद्ध रहेको’ बुद्ध एयरका बजार निर्देशक रुपेश जोशीले बताए । उनले थप ३ वटा जहाज केही महिनामै भित्र्याउने समेत बताए ।

बुद्ध एयरले पोखरालाई देशका विभिन्न गन्तव्यसँग सिधा उडान भरिरहेको छ । नेपालगञ्ज, भैरहवा, भरतपुर र सिमराबाट उडान भइरहेको र मार्च १ देखि जनकपुर र धनगढीबाट पनि उडान शुरु गर्न लागेको छ । त्यस्तै मार्चको १५ देखि भद्रपुरबाट पोखरा र विराटनगरबाट भैरहवा उडान भर्ने योजना पनि रहेको जनाएको छ ।अन्तर्राष्ट्रिय पर्यटकहरु नेपाल आउन आतुर रहेका छन् । पीसीआर परीक्षण र झन्झिटिलो फारमहरुलाई सहजीकरण गर्न बुद्ध एयर अनुरोध गरेको छ ।