कर्णालीमा एक वर्षमा चार सय ३० मानव अधिकार उल्लघंनका घटना

सुर्खेत – कर्णाली प्रदेशमा एक वर्षको अवधिमा चार सय ३० वटा मानव अधिकार उल्घंनका घटनाहरु भएका छन् । प्रजातन्त्र दिवसको अवसरमा अनौपचारिक क्षेत्र सेवा केन्द्र(इन्सेक) कर्णाली प्रदेशले शनिवार वीरेन्द्रनगरमा एक कार्यक्रमका बीच सन् २०२१ को वर्षभरिको तथ्यांक सार्वजनिक गरेको हो । 

इन्सेकले सार्वजनिक गरेको मानव अधिकार वर्ष पुस्तक २०२२ मा प्रदेशभर एक वर्षको अवधिमा तीन सय ९६ वटा ज्यादतिका घटना भएका छन् । जसमा तीन सय २० महिला र ७६ पुरुष पीडित भएका छन् । त्यसैगरी मानव अधिकार उल्लघंनका ३४ वटा घटेका छन् जसमा चार जना महिला र ३० जना पुरुष पीडित भएका इन्सेक कर्णाली प्रदेशका संयोजक नारायण सुवेदीले जानकारी दिए । 

इन्सेकको तथ्यांक अनुसार गत वर्षको तुलनामा यस वर्ष कर्णाली प्रदेशको मानव अधिकारको  अवस्थामा केही सुधार आएता पनि कारागारमा मृत्यु, परिवारजनबाट भएका हत्या र धम्कीका घटना गत वर्षभन्दा बढी रहेका छन् । 

अघिल्ला वर्षहरुझै जातीगत घटनाहरु बढेका छन् । इन्सेकले सार्वजनिक गरेको तथ्यांक अनुसार सुर्खेत कारागारमा दुई जना कैदीबन्दीको मृत्यु भएको छ । एक वर्षको अवधिमा ३४ जनाको हत्या भएको छ भने १४ जना धम्कीका घटनाबाट पीडित भएका छन् । यस वर्ष कणालीमा २३ जना मानवअधिकारकर्मीहरु पीडित भएका छन् । जसमा स्वास्थ्यकर्मी, पत्रकार तथा अधिकारकर्मीहरु रहेका छन् भने ८४ जना बालवालिका पीडित भएका छन् । यस वर्ष बालविवाहका आठ वटा घटना, बेचविखनका दुई, बलात्कारका ५३, यौन दुव्र्यवहारका २० जना पीडत भएका छन् । 

यस वर्ष पनि महिला हिंसाका घटनामा प्रवृक्तिगत कमी नआएको इन्सेकका संयोजक सुवेदीले बताए ।  कार्यक्रममा उच्च अदालत सुर्खेतका न्यायधिस शेषराज शिवाकोटीले मानव अधिकार उल्घंनका घटनाहरु घटेतापनि त्यति निराशाजनक अवस्था नरहेको औल्याए । प्रदेश प्रहरी कार्यालयका प्रहरी निरीक्षक जगदिश भट्टले फरार अभियुक्तलाई पक्राउ गर्ने काममा प्रहरी अघि बढेको भन्दै यसले मानव अधिकार प्रवद्र्धनमा सहयोग पुग्ने बताए । मानव अधिकार रक्षक संजाल कर्णाली प्रदेशका अध्यक्ष पिताम्बर ढकालले महिला हिंसा कम गर्न महिला प्रहरीको संख्या बढाउनुपर्नेमा जोड दिए ।