‘म यस्तो गीत गाउँछु’को प्रचार काइदा, भाषाभाषीका गीत

काठमाडौँ - महामारीका कारण बारम्बार सर्न बाध्य भएको फिल्म ‘म यस्तो गीत गाउँछु २’ले प्रदर्शन मिति नजिकिँदै गर्दा प्रचारको नयाँ शैली अपनाएको छ । रिलिजको संघारमा मुख्य कलाकार पल शाह र पूजा शर्मालाई लिएर काठमाडौँको हल हल दौडिएको फिल्मले बुधबार भने नयाँ दर्शकमाझ पुग्ने अभिप्रायसहित भाषाभाषीका गीत सार्वजनिक गरेको छ ।

निर्माण टिमले बुधबार नेवारी र थारु भाषामा फिल्म हेर्न निम्तो दिएको गीत सार्वजनिक गरेको हो । जसमध्ये थारु भाषाको गीत बुधबार नै युट्यबुमा सार्वजनिक भइसकेको छ भने नेवारी भाषाको गीत बिहीबार साँझ सार्वजनिक हुनेछ ।

अभिनेता पल शाहले सबै नेपालीको मन मुटुमा बस्ने अभिप्रायसहित भाषाभाषीका गीत बनाउने लक्ष्य लिएको तर महामारीका कारण दुइटाभन्दा बढी खिच्न नसकिएको जानकारी गराए । निर्देशक सुदर्शन थापाका अनुसार उनीहरूले ७ भाषामा गीत खिच्ने तयारी गरेका थिए । 

यही १३ गतदेखि प्रदर्शनमा आउन लागेको फिल्मको दुई गीतमध्ये थारु गीत चितवनको मेघौलीमा खिचिएको थियो भने नेवारी गीत मध्यपुर थिमीमा । निर्मातासमेत रहेकी पूजा शर्माले महामारीका कारण प्रतीक्षा लामो भएको बताउँदै फिल्मलाई माया गरिदिन आग्रह गरिन् । यही टिमले निर्माण गरेको पहिलो शृंखला सफल मानिएको थियो । निर्देशक थापाले यो शृंखला सफल भए तेस्रो भाग पनि बनाउने संकेत गरे ।