निलम्‍बित प्रधानन्यायाधीशको तस्बिर हटाउँदै-राख्‍दै

काठमाडौँ- प्रधानन्यायाधीश चोलेन्द्र शम्शेर राणाविरुद्ध महाअभियोग दर्ता भएसँगै आइतबार दिउँसो वेभसाइटमा राखिएको सर्वोच्च अदालतका न्यायाधीशको सूचीबाट नाम र तस्बिर दुवै हटेका थिए । राणाको तस्बिर हटाएर कामु प्रधानन्यायाधीश दीपकुमार कार्कीको तस्बिर राखिएको थियो ।

तर, मंगलबार फेरि राणाको नाम र तस्बिर दुवै राखिएको छ । अर्थात्, सर्वोच्च अदालतमा प्रधानन्यायाधीश र कामु प्रधानन्यायाधीश दुई जना रहेको देखाउँछ । ‘महाअभियोग दर्ता भएपछि प्रधानन्याधीशको फोटो वेभसाइटबाट हटाइएको थियो, तर निलम्बित अवस्थामा हटाउनु ठीक होइन भन्‍ने गुनासा आएपछि फेरि राखिएको छ’ सर्वोच्चका एक अधिकारीले इकागजसँग भने । सर्वोच्चको वेभसाइटभित्रको न्यायाधीशहरूको सूचीमा मात्रै राणाको तस्बिर राखिएको छ भने बाहिर कामु कार्कीको तस्बिर छ ।

राणाविरुद्ध सत्तारुढ गठबन्धनले आइतबार महाअभियोग प्रस्ताव दर्ता गरेका थिए ।