काठमाडौंमा ‘स्मार्ट’ शौचालय

काठमाडौं– काठमाडौं महानगरपालिकाले राजधानीमा स्मार्ट शौचालय सञ्चालनमा ल्याएको छ। सहरमा सार्वजनिक शौचालयको मागलाई पूरा गर्न स्मार्ट शौचालयको सुरुआत गरिएको हो ।

महानगरका मेयर विद्यासुन्दर शाक्यले त्रिपुरेश्वर बस बिसौनीसँगै आज स्मार्ट शौचालयको उद्घाटन गरे । एरोसान नेपालसँगको सहकार्यका निर्माण गरिएको शौचालय सञ्चालनमा ल्याएको हो ।

मेयर शाक्यले काठमाडौंमा सार्वजनिक शौचालय निर्मााणमा स्थानीयवासीले नजिक नबनाइदिनू भन्ने गरेकाले समस्या आएको बताए । ‘स्थानीयवासीको आग्रह आउन थालेपछि काम सुरु गर्दा विवाद हुनसक्ने सम्भावना भएकाले आवश्यकताअनुसारको शौचलय निर्माणमा समस्या परेको हो ।’ उनले भने ।

स्मार्ट शौचालय उद्घाटनपछि उनले दिगो विकासका लागि वातावरणमैत्री पूर्वाधार निर्माणमा महानगर लागिपरेको बताए । ‘जनतालाई प्रविधियुक्त सहरी सेवा दिन हामी तयार छौं,’ उनले भने ।

स्मार्ट शौचालय निर्माणमा सहकार्य गरेको एरोसानका प्रतिनिधि प्रकाश अमात्यले वातावरणमैत्री सार्वजनिक शौचालय बनाउन स्थान अभावले समस्या नहुने बताए । उनले स्मार्ट शौचालयमा बायो डाइजेस्टरसहित सबै प्रणाली थोरै ठाउँमा जडान गरिएको बताए।

शौचालयमा भवनबाट आकाशे पानी संकलन गरिन्छ । सो आकाशे पानीलाई प्रशोधन र प्रयोग गर्न मिल्ने उनको भनाइ छ। शौचालय महिला, बालबालिका, अपांगता भएका व्यक्ति, ज्येष्ठ नागरिक सबैका लागि प्रयोगमैत्री छ ।

हेर्दा सफा देखिने शौचालयमा महिनावरी भएका महिलाका लागि स्यानिटरी प्याड प्रयोग गर्न र त्यसको व्यवस्थापन गर्न मिल्ने डिस्पोजल मेसिनको समेत यहाँ व्यवस्था गरिएको छ महानगरपालिकाले सार्वजनिक पार्क निर्माण गरेको स्थानमा यस्ते शौचलय निर्माण गर्ने जनाएको छ । हरियालीको आनन्द लिदैँ पार्क घुम्न आउने हरेकले शौचालयका लागि विकल्प खोज्न नपर्ने मेयर शाक्यले बताए । वातावरणीय र जनवास्थ्यको पक्षलाई ध्यानमा राखेर ३२ वटै वडामा यस्ता शौचालय निर्माण गर्ने नीति महानगरको रहेको छ ।

सर्वसाधारणलाई सहज शौचको व्यवस्था होस् भन्ने हेतूले काठमाडौँ महानगरपालिकाले आर्थिक वर्ष २०७८/७९ को नीति, कार्यक्रम तथा बजेटमा होटल, रेष्टुरेन्ट पसल जस्ता व्यवसायहरुले आफ्नो प्रयोजनका लागि बनाएका शौचालयमा सर्बसाधारणका लागि निःशुल्क सेवा उपलब्ध गराएमा व्यवसाय करमा ५० प्रतिसत छुट दिने घोषणा गरेको छ ।

यो शौचालय करिब ३५ लाखको लगानीमा यो शौचालय निर्माण गरिएको हो ।